Ի՞նչ է կատարվում առողջապահության նախարարի հետ․ Փաշինյանը Թորոսյանին արձակուրդ է ուղարկել
ԵՐԵՎԱՆ, 25 օգոստոսի․ /Նովոստի-Արմենիա/․ ՀՀ վարչապետ Նիկոլ Փաշինյանը երեքշաբթի՝ օգոստոսի 25-ին ստորագրել է որոշում, որի համաձայն` ՀՀ առողջապահության նախարար Արսեն Թորոսյանն արձակուրդ է գնում։
«Հայաստանի Հանրապետության առողջապահության նախարար Արսեն Թորոսյանին տրամադրել 2018-2019 թվականների աշխատանքային տարվա ամենամյա նվազագույն արձակուրդի չօգտագործված մասը և 2019-2020 թվականների աշխատանքային տարվա ամենամյա նվազագույն արձակուրդի մասը՝ 2020 թվականի օգոստոսի 31-ից սեպտեմբերի 18-ը ներառյալ»,- նշվում է ՀՀ կառավարության կայքում տեղադրված՝ վարչապետի որոշման մեջ:
Նշվում է նաև, ոև Արսեն Թորոսյանի արձակուրդում գտնվելու ընթացքում Հայաստանի Հանրապետության առողջապահության նախարարին կփոխարինի Հայաստանի Հանրապետության առողջապահության նախարարի առաջին տեղակալ Անահիտ Ավանեսյանը:
Ի՞նչ է կատարվում նախարարի հետ
Նախօրեին հայկական սոցիալական ցանցերն անհանգստացած են մի լուրով. փակվել է ոչ միայն ՀՀ առողջապահության նախարար Արսեն Թորոսյանի Facebook-յան պաշտոնական, այլև անձնական էջը։ Էջ մուտք գործելու ժամանակ, նշվում է, որ բովանդակությունը հասանելի չէ, հնարավոր է, սեփականատերը ջնջել է բովանդակությունը կամ սահմանափակվել մուտքը:
Հրաժարականի մեկ այլ հավանական պատճառ էլ կոռուպցիայի կանխարգելման հանձնաժողովում Թորոսյանի դեմ հարուցված վարույթն է՝ իրավիճակային շահերի ապօրինի բախման փաստով:
Չնայած տարբեր լուրերին, պաշտոնական կողմը չի մեկնաբանում իրավիճակը: «Նովոստի-Արմենիա» գործակալությունը պաշտոնական մեկնաբանության համար դիմեց ՀՀ Առողջապահության նախարարության մամուլի քարտուղար Ալինա Նիկողոսյանին, որը ձեռնպահ մնաց մեկնաբանություններից: Նա չմեկնաբանեց նախարարի էջի փակումը սոցցանցում կամ նրա հնարավոր հրաժարականը:
Լրատվամիջոցները նաև լուրեր են տարածում, թե Փաշինյանը ծայրաստիճան դժգոհ է Թորոսյանի աշխատանքից, մասնավորապես, կորոնավիրուսի դեմ պայքարի համատեքստում -0-
