Ի՞նչ անել օդի աղտոտվածության դեպքում. Խորհուրդներ

ԵՐԵՎԱՆ, 11 հոկտեմբերի. /Նովոստի-Արմենիա/. Առողջապահության նախարարությունն անդրադարձել է օդի աղտոտվածության վտանգներին և ներկայացրել դրանցից պաշտպանվելու միջոցները:

Նշենք, որ Երևանում, հատկապես կենտրոնում, նկատվում է օդի աղտոտվածության առավել բարձր մակարդակ Նուբարաշենի աղբավայրում բռնկված հրդեհից հետո առաջացած ծխի հետևանքով, որը պատել է ամբողջ քաղաքը:

Օդի աղտոտվածության բարձր մակարդակը կարող է բացասաբար ազդել հատկապես խոցելի խմբերի առողջության վրա՝ երեխաներ, տարեցներ, հղի կանայք, շնչառական և սրտանոթային խնդիրներ ունեցող անձինք։

Ի՞նչ վտանգներ ունի օդի աղտոտվածությունը

• Օդի աղտոտվածությունն առաջացնում է հետևյալ առողջական խնդիրները․

• Շնչառական դժվարություններ (խորը շունչ քաշելիս անհարմարություն, հազ, շնչահեղձություն)

• Սրտանոթային խնդիրների սրացում

• Աչքերի գրգռվածություն և արցունքահոսություն

• Գլխացավեր, հոգնածություն

• Երեխաների մոտ՝ բրոնխիտ, ասթմայի սրացում, ուշադրության խանգարումներ

Ինչպես պաշտպանել Ձեզ և Ձեր ընտանիքին

• Մնացե՛ք փակ տարածքում

• Փակեք դռներն ու պատուհանները, երբ աղտոտվածության մակարդակը բարձր է։

• Հատկապես քաղաքներում և խիտ երթևեկության վայրերում գտնվելու ժամանակ կրեք պաշտպանիչ դիմակ (N95 կամ համապատասխան ֆիլտրով)։

• Զերծ մնացե՛ք ֆիզիկական ակտիվությունից դրսում

• Խուսափեք մարզվելուց, երկար քայլելուց կամ երեխաներին խաղացնելուց բացօթյա՝ աղտոտվածության բարձր ժամերին։

• Հետևե՛ք օդի որակի մասին տեղեկատվությանը

• Օգտվե՛ք հատուկ հավելվածներից կամ պաշտոնական աղբյուրներից՝ օրվա ընթացքում օդի որակի մասին տեղեկանալու համար։

• Հոգ տարե՛ք խոցելի խմբերի մասին

• Տարեցները, երեխաները, հղիները և քրոնիկ հիվանդություններ ունեցողները պետք է լինեն առավել զգուշավոր։