ԻԻՀ-ում ՀՀ դեսպանությունը ողջ անձնակազմով շարունակում է իր բնականոն գործունեությունը

ԵՐԵՎԱՆ, 23 փետրվարի./Նովոստի-Արմենիա/. ԻԻՀ-ում ՀՀ դեսպանությունը ողջ անձնակազմով շարունակում է իր բնականոն գործունեությունն իր գործառույթների ողջ ծավալով: Այս մասին հաղորդվում է ԻԻՀ-ում ՀՀ դեսպանության Facebook-յան էջում:

«Ի պատասխան քաղաքացիների կողմից արված մի շարք հարցադրումների՝ կապված դեսպանության աշխատանքի հետ, հայտնում ենք, որ ԻԻՀ-ում ՀՀ դեսպանությունը ողջ անձնակազմով շարունակում է իր բնականոն գործունեությունն իր գործառույթների ողջ ծավալով, այդ թվում՝ շուրջօրյա ծառայություն մատուցելով ՀՀ քաղաքացիներին և ձեռնարկելով բոլոր հնարավոր քայլերը մեր քաղաքացիների առջև ծառացած խնդիրների լուծման ուղղությամբ»,- նշվում է տարածված հաղորդագրության մեջ:

Դեսպանությունում գործում է թեժ գիծ, պահպանվում է մշտական կապ Իրանում գտնվող մեր հայրենակիցների հետ:

Հայտարարության համամձայն, վերոնշյալ գործառույթների արդյունավետ իրականացման համար որոշում է կայացվել ժամանակավորապես դադարեցնել հյուպատոսական հերթագրումը և ընդունելությունը, որոնք տեխնիկական, կազմակերպական անհրաժեշտ միջոցառումների իրականացումից հետո լիարժեքորեն կվերականգնվեն:

Նշենք, որ Իրանում կորոնավիրուսով վարակի առաջին դեպքը գրանցվել է փետրվարի 19–ին։ Այսօրվա դրությամբ Իրանում կորոնավիրուսից մահացել է 5 մարդ։ Իրանում 2019-nCoV տիպի կորոնավիրուս է ախտորոշվել 28 մարդու մոտ։ Այսօր Facebook–ի հայկական հատվածում ակտիվորեն քննարկվում էր հայ–իրանական սահմանը փակելու անհրաժեշտությունը գոնե Նովրուզ Բայրամի ժամանակահատվածում, որը բազմաթիվ իրանցիներ նախընտրում են տոնել Երևանում։-0-