ՀՔԾ–ն` ընդդեմ խոսքի և մամուլի ազատության. թերթը պահանջում է չբացել տեղեկատվության աղբյուրները

ԵՐԵՎԱՆ, 19 մարտի. /Նովոստի–Արմենիա/. Նախորդ շաբաթ «Ժողովուրդ» թերթը հրապարակել է մարտի 1–ի գործով երեք վկաների, այդ թվում` նախկին նախագահ Սերժ Սարգսյանի հարցաքննությունները։ Հոդվածների հրապարակումից հետո Հատուկ քննչական ծառայությունը քրեական գործ է հարուցել նախաքննության նյութերի հրապարակման փաստով։

Ինչպես նշում է պարբերականը, հարուցված քրեական գործն ամենևին էլ «Ժողովուրդ» օրաթերթի դեմ չէ, որովհետև «Զանգվածային լրատվության մասին» ՀՀ օրենքը հստակ սահմանում է, որ լրատվական գործունեություն իրականացնողը որևէ պատասխանատվություն չի կրում օրենքով սահմանված կերպով գաղտնի համարվող տեղեկատվությունը հրապարակելու համար։

Հետևաբար, ինչպես նշում է թերթը, ՀՔԾ–ի իրավաբանական թիրախը ոչ թե «Ժողովուրդ» թերթն է, որը տեղեկատվություն տարածողն է, այլ այն մարդը կամ մարդիկ, որը կամ որոնք փոխանցել են մարտի 1–ի գործով տվյալները լրագրողին։


Բայց, պարբերականի հաղորդմամբ, այնուամենայնիվ, քրեական գործն ուղղակի հարվածելու է «Ժողովուրդ» օրաթերթի և ընդհանրապես լրատվամիջոցների գործունեությանը, քանի որ այսուհետ տեղեկատվության աղբյուրները, որոնք ցանկանում են գաղտնի մնալ կփորձեն զգուշանալ, և լրագրողները կարող են զրկվել տեղեկատվության թանկարժեք աղբյուրներից, որոնց վստահությունը ձեռք բերելու համար ստիպված են եղել տևական ժամանակ լուրջ աշխատանք կատարել։

«Այնպես որ, ՀՔԾ այս քայլն ուղղակի հարված է խոսքի և մամուլի ազատությանը, տեղեկատվության ազատությանը, հասարակության` տեղեկացված լինելու իրավունքին»,– գրում է թերթը։ -0-