ՀՀ ՊՆ-ն մեկնաբանել է նախօրեին անհետ կորածների հարազատների ակցիայի ժամանակ տեղի ունեցած միջադեպը
ԵՐԵՎԱՆ, 30 սեպտեմբեր․/Նովոստի-Արմենիա/. ՀՀ պաշտպանության նախարարությունը հայտարարություն է տարածել նախօրեին անհետ կորած զինվորների հարազատների կողմից անցկացված ակցիայի վերաբերյալ։
Սեպտեմբերի 29-ին ՀՀ ՊՆ-ի դիմաց միջադեպ է տեղի ունեցել անհետ կորած զինվորների հարազատների և ռազմական ոստիկանության աշխատակիցների միջև։ Ակցիայի մասնակիցները պահանջել են հանդիպում ՀՀ ԶՈՒ գլխավոր շտաբի պետ Էդվարդ Ասրյանի հետ՝ անհետ կորած զինվորների վերաբերյալ տեղեկություններ ստանալու համար, այդ թվում՝ 2020 թ.-ին Արցախում տեղի ունեցած 44-օրյա պատերազմի ժամանակ։ Նրանց տեղեկացվել է, որ պաշտպանության փոխնախարար Արման Սարգսյանն արդեն պատրաստ է հանդիպել իրենց հետ հոկտեմբերի 3-ին։ Սա վրդովեցրել է ցուցարարներին, ովքեր մեղադրել են նրանց խաբեության և մանիպուլյացիայի մեջ։
«Ակցիայի մասնակիցների նկատմամբ ՊՆ ծառայողները դրսևորել են հարգալից վերաբերմունք, նրանց նկատմամբ բիրտ ուժի կիրառման դեպք չի արձանագրվել: Միաժամանակ անհրաժեշտ ենք համարում ընդգծել, որ ակցիայի որոշ մասնակիցներ ռազմական ոստիկանության ծառայողների ուղղությամբ շշեր են նետել, ինչպես նաև այլ առարկաներով տարբեր գործողությունների դիմել (տեսանյութերն առկա են), ինչին ի պատասխան՝ ՌՈ ծառայողների գործողությունները շարունակել են մնալ հարգալից»,-նշվում է ՊՆ հաղորդագրության մեջ։
Նշվում է, որ իրավիճակին և տեղեկատվությանը չտիրապետող որոշ լրատվամիջոցներ պնդում են, թե իբր երեկ ՊՆ վարչական համալիրի մոտ ակցիա իրականացնող քաղաքացիների հետ պաշտպանության նախարարությունում որևէ հանդիպում տեղի չի ունեցել:
«Ակցիայի անմիջապես մեկնարկին պաշտպանության նախարարությունը հանդիպման առաջարկ է ներկայացրել նախարարի տեղակալ, միևնույն ժամանակ Գերիների, պատանդների և անհայտ կորած (գտնվելու վայրն անհայտ) անձանց հարցերով զբաղվող միջգերատեսչական հանձնաժողովի նախագահի տեղակալ Արման Սարգսյանի, իսկ այնուհետև՝ ՀՀ ԶՈՒ ԳՇ օպերատիվ գլխավոր վարչության պետ-զինված ուժերի գլխավոր շտաբի պետի տեղակալ, գեներալ-մայոր Թեմուր Շահնազարյանի հետ»,-ասվում է հաղորդագրությունում։
Նշվում է նաև, որ ակցիայի մասնակիցները պնդել են, որ ցանկանում են հանդիպել ԳՇ պետի և ԶՈՒ-ից զորացրված մի շարք անձանց հետ: ԳՇ պետ Էդվարդ Ասրյանն ընդունել է քաղաքացիներին, հանդիպումը տևել է մի քանի ժամ:
