Հազարավոր մարդիկ կմահանան դժոխային շոգից

ԵՐԵՎԱՆ, 29 հունիսի. /Նովոստի-Արմենիա/. Եվրոպացի գիտնականներն ու օդերևութաբանները կանխատեսում են, որ 2019 թվականի հունիսի վերջին անոմալ շոգից կարող են հազարավոր մարդիկ մահանալ: Այդ մասին հայտնում է lenta.ru-ն` հղում անելով The Washington Post-ին:

Ֆինն օդերևութաբան Միկա Ռանտանենը (Mika Rantanen) որոշել է Ֆրանսիայի վրա եկող ջերմային աննախադեպ ալիքը շոգի ինտենսիվության համակարգչային մոդելավորման արդյունքների հիման վրա: Պոտսդամի համալսարանի կլիմայագետ Շտեֆան Ռամշտորֆի (Stefan Rahmstorf) խոսքով, օդի բարձր ջերմաստիճանը «լուռ մարդասպան է»: Գիտնականը հիշեցնում է, որ 2003 թվականին տապը 70 հազար եվրոպացի է սպանել, իսկ նախորդ ամառ Գերմանիայում մահացել է առնվազն հազար մարդ:

Ամենաբարձր ջերմաստիճանները կդիտվեն Եվրոպայի արևմտյան և կենտրոնական հատվածներում: Իսպանիայի և Ֆրանսիայի որոշ շրջաններում մի քանի տարիների ընթացքում կգրանցվի ավելի քան 40 աստիճան տաքություն: Իսպանացի օդերևութաբան Սիլվիա Լապլանան (Silvia Laplana) ապագա եղանակը նկարագրել է որպես «սպասվող դժոխք»: Կանխատեսվում է, որ Մադրիդում սնդիկի սյունը կբարձրանա մինչև 40,6 աստիճան:

Շոգի պատճառը Գրենլանդիայի մոտ և հյուսիս-կենտրոնական Եվրոպայում տեղակայված բարձր ճնշման երկու դաշտերն են: Դրանք արգելափակում են հարավային ցիկլոնը, որը կարող էր սառեցնել օդը: Արդյունքում առաջանում է իսպանական և աֆրիկյան անապատներից ձգվող տաք օդի շլեյֆ: Արդյունքում սպասվում են ջերմաստիճանային ռեկորդներ և ինտենսիվ ամպրոպներ: -0-