ԵՐԵՎԱՆ, 9 հոկտեմբերի. /Նովոստի-Արմենիա/. Վերջին հարյուր տարիների ընթացքում կյանքի միջին տևողությունն ավելանում էր գրեթե անընդհատ հանրային առողջապահության և կյանքի ընդհանուր պայմանների բարելավման շնորհիվ, գրում է
vokrugsveta.ru կայքը:
Այսպես, մասնագետների կանխատեսումներով, այսօր ամերիկացի երեխաների կյանքի տևողությունը կարող է հասնել 79 տարվա: Համեմատության համար՝ 1900 թվականին ծնվածներն ապրում էին միջինը 47 տարի: Սակայն կյանքի տևողության աճի միտումը շեմ ունի, և, Nature ամսագրում հրապարակված նոր հետազոտության համաձայն, այն արդեն հայտնի է:
Նյու Յորքի համալսարանի գիտնականները վերլուծել են ավելի քան 40 երկրների մարդկանց մահացության տվյալներ՝ ուշադրությունը սևեռելով Ֆրանսիայի, Ճապոնիայի, ԱՄՆ-ի և Մեծ Բրիտանիայի վրա: Նրանց գլխավորապես հետաքրքրում էր, թե ինչպես է փոխվել կյանքի տևողությունը 1900 թվականից 100 տարեկանից բարձր մարդկանց շրջանում:
Պարզվել է, որ երկարակյացների թիվը սկսել է կտրուկ նվազել հենց 100-ամյակը հատելուց հետո: Ընդ որում, դա գործում է տարբեր տարիների ծնված մարդկանց համար:
Գիտնականների հաշվարկներով, մարդու կյանքի առավելագույն տևողությունը կազմում է 115 տարի, դա երկարակյացների միջինացված ցուցանիշ է: Այսօրվա դրությամբ, առավելագույն փաստաթղթավորված կյանքը կազմում է 122 տարի, հենց այդքան է ապրել ֆրանսուհի Ժաննա Կալմանը: Հետազոտողողների կարծիքով, մարդու կյանքի տևողության բացարձակ շեմը կարող է կազմել 125 տարի: Ամենամյա հավանականությունը, որ աշխարհում գոնե մեկ մարդ կարող է ապրել 125 տարի, կազմում է 0,0001:
«Ինֆեկցիոն և քրոնիկ հիվանդությունների բուժման հետագա առաջընթացը կարող է բարձրացնել կյանքի միջին տևողությունը, բայց ոչ առավելագույնը», — ասում է Նյու Յորքի համալսարանի դոկտոր Յան Վիյգը:
Գիտնականը նշում է, որ բժշկության ապագա նվաճումները տեսականորեն կարող են ավելացնել կյանքի առավելագույն տևողությունը, սակայն դրա համար պետք կլինի լուծել մի շարք գենետիկ հարցեր: Հնարավոր է, ըստ գիտնականի, ավելի լավ է ուղղել ուժերն ու միջոցները ոչ թե կյանքի երկարացմանը, այլ մարդու առողջ ծեռացմանը: -0-
