Հայաստանը Լավ երկրների ինդեքսում բարձրացել է 30 կետով. Փաշինյանի կարծիքով, չարժե դա թերագնահատել

ԵՐԵՎԱՆ, 27 հունվարի. /Նովոստի-Արմենիա/. Հայաստանը «Լավ երկրների ցուցիչում» (The Good Country Index) 2018 թվականին զբաղեցրել է 45-րդ տեղը:

Հետխորհրդային տարածքի երկրներից մեր երկրից առաջ են անցել Էստոնիան (14 տեղ), Լատվիան (21), Մոլդովան (27), Լիտվան (37), Վրաստանը (39) և Ռուսաստանը (41): Միաժամանակ, Հայաստանն առաջ է անցել Բելառուսից (54), Ղրղըզստանից (69), Ուկրաինայից (75), Ղազախստանից (105) և Ադրբեջանից (108):

Հայաստանի վարչապետ Նիկոլ Փաշինյանը Facebook-ի իր էջում գրել է, որ մեր երկիրը, փաստորեն, 2018 թվականի ընթացքում ուղիղ 30 կետով բարելավել է դիրքերը՝ 75-ից տեղափոխվելով 45-րդ հորիզոնական:

«Եթե 2019-ին նույնքան առաջընթաց արձանագրենք, կհայտնվենք լավ երկրների առաջին տասնյակի մատույցներում: Իհարկե, նման ինդեքսներն ու առաջընթացները ոչ մի այսրոպեական արդյունք չեն տալիս, բայց բարձրացնում են երկրի գրավչությունը՝ տուրիզմի, ներդրումների իմաստով: Այնպես որ, չարժե թերագնահատել»,- գրել է նա:

Վարկանիշի առաջին տասնյակում են Ֆինլանդիան, Իռլանդիան, Շվեդիան, Գերմանիան, Դանիան, Շվեյցարիան, Նորվեգիան, Ֆրանսիան, Իսպանիան և Կանադան: Աութսայդերներն են` Իրաքը, Լիբիան, Յեմենը, Մավրիտանիան, Սուրինամը:

Վարկանիշում ներառվել է 153 երկիր: -0-