Գերմանիայի բունդեսթագի պատգամավորը կոչ է արել լուծարել ՆԱՏՕ–ն

ԵՐԵՎԱՆ, 5 ապրիլի. /Նովոստի–Արմենիա/. ՆԱՏՕ–ն սպառնալիք է համաշխարհային անվտանգության համար, այդ իսկ պատճառով դաշինքն անհրաժեշտ է լուծարել։ Այդ մասին գրել է բունդեսթագի Ձախ կուսակցության պատգամավոր Ալեքսանդր Նոյը Die Freiheitsliebe հոդվածում, հայտնում է lenta.ru–ն։

Այդ կապակցությամբ կազմակերպության 70–ամյակը տոնի առիթ չէ, այլ հնարավորություն վերլուծելու կատարվողը, «քանի դեռ շատ ուշ չէ», գրել է խորհրդարանականը։

Նրա կարծիքով, դաշինքի զորքերի ծախսերը և զինումը, որոնք արդարացվում են Ռուսաստանի և Չինաստանի օժանդակութւյամբ, իրականում չափազանց մեծ են և համաչափ չեն այդ երկրների ուժերի հետ։

Բացի այդ, ՆԱՏՕ–ն վերջին տասնամյակներին ցույց է տվել իր իրական դեմքը` հարձակվելով Հարավսլավիայի վրա, մտնելով Աֆղանստան և մասնակցելով բազմաթիվ այլ հակամարտությունների, ասել է նա։

Նոյը նշում է, որ իմպերիալիստական նկրտումները և գերազանցությունը կորցնելու վախը մղում են դաշինքը նոր առճակատումների, և դրան պետք է վերջ դնել։ «Այդ կապակցությամբ Ձախ կուսակցությունը կոչ է անում դուրս գալ Գերմանիային ՆԱՏՕ–ի կառույցներից, դաշինքի լուծարմանը և դրա փոխարինմանը Ռուսաստանի մասնակցությամբ անվտանգության հավաքական համակարգով, որը գլխավոր նպատակ կհռչակի զինաթափումը»,– ասվում է հոդվածում։

Ավելի վաղ ՆԱՏՕ–ի պաշտպանական քոլեջը պատմել է ռազմական դաշինքի երեք տարբերակների մասին։ Դրանցից յուրաքանչյուրում Ռուսաստանը հակառակորդ է անվանվում։

Մարտին գերմանական ԶԼՄ–ները պատմել են դաշինքում առկա ճգնաժամի մասին։ Նշվում է, որ կազմակերպության անդամների միջև բազմաթիվ խնդիրներ են կուտակվել, իսկ Գերմանիան մեղադրում են ժլատության և ֆինանսական խոստումների չկատարման մեջ, ինչն արդյունքում քայքայում է ռազմական դաշինքը։

Ապրիլի 4–ին լրացել է ՆԱՏՕ–ի ստեղծման 70 տարին։ Հյուսիսատլանտյան դաշինքը ստորագրվել է 1949 թվականի ապրիլի 4–ին։
Դրա գլխավոր դրույթը հինգերորդ հոդվածն է, որի համաձայն, Եվրոպայի կամ Հյուսիսային Ամերիկայի մեկ կամ մի քանի երկրների վրա հարձակումը կնշանակի հարձակում նրանց վրա ընդհանուր առմամբ։ -0-