Երգիչ Անդրեի կնոջ գրառման դեպքի առթիվ Դատախազությունում ուսումնասիրություն է սկսվել
ԵՐԵՎԱՆ, 8 ապրիլի․/Նովոստի–Արմենիա/․ Երգիչ Անդրեի կնոջ՝ Անի Օհանյանի Instagram–յան գրառման դեպքի առթիվ Դատախազությունում ուսումնասիրություն է սկսվել։
Այս մասին «Նովոստի–Արմենիա» գործակալությանը հայտնեցին Գլխավոր դատախազությունից։
Նշենք, որ օրերս Անի Օհանյանը գրառում է կատարել Instagram–յան իր էջում՝ անդրադառնալով իր ամուսնական կյանքի սարսափելի դրվագներին։ Թեև Անին ուղղակիորեն չի նշել, որ խոսքը Անդրեի մասին է, սակայն նրա գրառումից պարզ է դառնում, որ խոսքը նրա մասին է։
Ստորև ներկայացնում ենք Անի Օհանյանի ամբողջական գրառումը․
«Իմ ճանապարհը լի էր վախերով ու պայքարով։ Ես սիրում էի այն մարդուն, ով հմայեց ինձ: Բայց ջենթլմենի գեղեցիկ դիմակի հետևում սարսափելին էր թաքնված։
Սկզբում ամբողջ ժողովրդի աչքի առաջ ծնվեց հեքիաթը։ Դուք հավատացիք նրան այնպես ինչպես ես: Շուտով աշխարհը սկսեց փլուզվել: Իմ ամեն օրը սկսվում էր տագնապով ու անհանգստությունով՝
«Այսօր նա չար կլինի, թե բարի, նորից կվիրավորի, կհարվածի, թե կրկին սպառնալու է, որ կզրկի երեխայից»։
Ես կարծում էի, որ կարող եմ փրկել ընտանիքը և փոխել նրան դեպի լավը, սակայն նրա ագրեսիան միայն աճում էր։ Նա չէր գիտակցում, թե որքան ցավ է պատճառում ինձ:
Ես զգում էի, որ հոգիս դանդաղորեն քանդվում է, բայց շարունակում էի հուսալ, որ նա կհասկանա և կփոխվի: Ես հասկացա, որ սերը չպետք է տառապանք բերի: «Կներես» բառը ելք չէ։ Դա անընդհատ կրկնվում էր: Այսօր ես համարձակվում եմ խոսել:
Այս ամբողջ ընթացքում ես ստիպված էի ժպտալ տեսախցիկների և մարդկանց առջև՝ցուցադրել «երջանկություն» այն ժամանակ, երբ ոչ ոք չգիտեր, թե ինչ է կատարվում փակ դռների հետևում:
Այս գրառումը ոչ միայն աղաղակ հոգու, դա կոչ է բոլոր կանանց, ովքեր տառապում են ինձ նման։ Աղջիկներ, կանայք ,մայրեր Դուք արժանի եք սիրո, որը բերում է լույս և ոչ թե խավար»։
Նշենք, որ ՀՀ քրեական դատավարության օրենսգրքի համաձայն, զանգվածային լրատվության միջոցներում առերևույթ հանցանքի մասին հրապարակված տեղեկությունները քննիչի համար կարող են քրեական վարույթ նախաձեռնելու առիթ լինել:
2022թ․–ի նոյեմբերին Անդրեն հրապարակեց տեսանյութ, որտեղ երևում էր, թե ինչպես է ամուսնության ռոմանտիկ առաջարկություն անում Անիին Տաթևի վանքում։ 2022թ․–ի մայիսին հայտնի դարձավ, որ զույգն ամուսնացել է։
