Բելառուսահայ բլոգերը պատմել է իր ընտանիքի և ընկերների հետապնդման մասին (ՎԻԴԵՈ)

ԵՐԵՎԱՆ, 20 հուլիսի. /Նովոստի–Արմենիա/. Բելառուսահայ բլոգեր Վլադիսլավ Մոսեսովը (Վլադ Մագա) պատմել է, թե ինչ հետապնդումների է ենթարկվում ինքը, իր բարեկամներն ու ընտանիքը։
Ներկայում բլոգերը գտնվում է Հայաստանում։

«Մի մարդ, որ ինձնից առաջ հայտնվել էր արդեն այս իրավիճակում, զգուշացնում էր ինձ, որ կարող են գալ ոչ միայն քո հետևից, կարող են գալ քո ընտանիքի, ընկերների հետևից։ Ես թերագնահատել եմ իրավիճակը»,– ասում է բլոգերը։

Նա նշում է, որ իրեն սպառնացողները եկել են իր քաղաք, մարդկանց հարցրել են, թե «գիտեն նրանք արդյո՞ք Վլադիսլավ Մոսեսովին, որտեղ են ապրում նրա ընկերները, հարազատները»։
«Օրենքով, քանի դեռ լույս չի տեսել Արցախի մասին տեսանյութը, որը շուտով լույս կտեսնի, ինձ ոչնչի համար չեն կարող անհանգստացնել, այդ իսկ պատճառով հարցն իրենց ուժերով են լուծում։ Ես դա չէի իմանա, եթե նրանք չկպնեին իմ ընկերներին։ Հաջորդ օրը մայրս տեսնում է, որ պտտվում են մուտքի մոտ։ Դա նորմա՞լ է»,– ասել է Մոսեսովը, նշելով, որ նրան հետապնդողները մեծ սխալ են գործել։


Բլոգերի խոսքով, այժմ, երբ գործը հասել է իր շրջապատին, ինքը հաստատ գնալու է մինչև վերջ։
«Այժմ նրանք արդեն հասել են իմ ընտանիքին, և սա չափազանց է, նրանք անցել են սահմանները»,– ասել է Մոսեսովը։

Մոտ տասն օր առաջ բլոգերն իր ալիքում նյութ է հրապարակել Ադրբեջան կատարած այցի մասին, ինչից հետո սպառնալիքների մի ալիք է նրա վրա թափվել։ Բլոգերն ավտոստոպով է գնացել Ադրբեջան, այցելել է Բաքու, որտեղ նրան հյուրընկալել են անծանոթ մարդիկ, հյուրասիրել, գիշերակաց ապահովել։ Բաքվում նա ցույց է տվել կենտրոնական և ծայրամասային հատվածների կոնտրաստը, այնուհետև մեկնել է ադրբեջանական հեռավոր Ջոնի գյուղը, որտեղ նրան մշտապես հարցուփորձ են արել ազգության մասին և փաստաթղթեր ստուգել։ Այնտեղից բլոգերը մեկնել է Կիրովաբադ (այժմ` Գյանջա), որտեղ մի ժամանակ ապրել են նրա պապերը։ Նա որոշել է այցելել այդ տեղը, ցույց տալ իրենց հին տունը։ -0-