ԵՐԵՎԱՆ, 20 փետրվարի./Նովոստի–Արմենիա/. Վարչապետ Նիկոլ Փաշինյանը չորեքշաբթի ընդունել է աշխարհահռչակ շանսոնյե Շառլ Ազնավուրի որդուն՝ Նիկոլա Ազնավուրին, հայտնում է կառավարության մամուլի ծառայությունը։
Հիշեցնենք, որ Նիկոլա Ազնավուրն «Ազնավուր» հիմնադրամի համահիմնադիրն է:
Ողջունելով հյուրին` Նիկոլ Փաշինյանը, մասնավորապես, նշել է, որ ուրախ է հանդիպել նրան Երևանում։
«Հույս ունեմ, որ Ձեր հետագա ծրագրերն ավելի շատ կապված են Երևանի հետ, համենայնդեպս, մամուլում կան այդպիսի հրապարակումներ: Հույս ունեմ, որ այդպես է և ավելի հաճախ հնարավորություն կունենանք հանդիպել, շատ հետաքրքիր կլինի լսել Ձեր ծրագրերի մասին, թե ինչ եք ծրագրում անել Շառլ Ազնավուրի ժառանգությունը նաև Հայաստանում պահպանելու և Հայաստանը որպես ազնավուրյան կարևոր կենտրոններից մեկը դարձնելու նպատակով և իմաստով»,– ասել է վարչապետը:
Загружается новость ...
"Право"
Նիկոլա Ազնավուրը շնորհակալություն է հայտնել վարչապետ Փաշինյանին ջերմ ընդունելության համար և Փարիզ այցելելու համար:
«Դուք գիտեք, որ դա շատ կարևոր էր ու շատ հուզիչ անձամբ ինձ համար և իմ ողջ ընտանիքի: Ցանկանում եմ Ձեզ հայտնել մեր երախտագիտությունը: Ցանկանում եմ Ձեզ շնորհավորել վարչապետի պաշտոնը զբաղեցնելու կապակցությամբ: Ես անգամ քվեարկել եմ Հայաստանում: Մենք եկանք անաղմուկ, հատուկ քվեարկելու համար, քանի որ դա շատ կարևոր էր մեզ համար»,– ասել է Շառլ Ազնավուրի որդին։
Նա ընդգծել է, որ նույնիսկ ճանապարհորդելիս կամ Հայաստանից հեռու լինելիս միշտ հետևում են Հայաստանից ստացվող լուրերին։
«Շատ շնորհակալ ենք այն ամենի համար, ինչ Դուք փորձում եք անել Հայաստանի համար: Դա հեշտ չէ, բայց կարծում եմ շատ դրական է, երբ մենք արտասահմանում տեսնում ենք, թե ինչ տքնաջան աշխատանք եք իրականացնում»,– ավելացրել է Ազնավուրը:
Հանդիպման ընթացքում Նիկոլա Ազնավուրը վարչապետին պատմել է «Ազնավուր» հիմնադրամի գործունեության և առաջիկա ծրագրերի մասին: -0-
