ԵՐԵՎԱՆ, 21 հուլիսի./Նովոստի–Արմենիա/. Դիետոլոգ Եկատերինա Յաշչենկոն պարզաբանել է ամառային ամենատարածված` լոլիկով և վարունգով աղցանի օգտակարության մասին միֆերը։
Այս աղցանի հարցում մասնագետների կարծիքները շատ տարբեր են։ Ոմանք նշում են, որ այն օգտակար է, մյուսները, հակառակը, խոսում են աղցանի վնասակարության մասին, գրում է medikforum–ը։
«Պատասխանը գտնելու համար պետք է պարզել լոլիկի և վարունգի հատկություններն ու հասկանալ` արդյոք նրանց կարելի է միասին օգտագործել», – նշել է Յաշչենկոն։
Առաջին միֆը վերաբերում է նրան, որ լոլիկը C վիտամինի մեծ աղբյուր է։ Առաջին հերթին բուլղարական պղպեղը մոտ 7 անգամ ավելի շատ C վիտամին է պարունակում։ Երկրորդը, լոլիկում առկա C վիտամինը քանդում է վարունգում առկա ասկորբինազ ֆերմենտը։ Եվ որքան երկար են այս երկու բանջարեղենները մնում իրար հետ, այնքան ավելի շատ C վիտամին է «սպանում» վարունգը։
Ոմանք կարծում են, որ աղցանի պատճառով փորը կարող է ուռչել, այն կարող է առաջացնել ստամոքսի խանգարում։ Իրականում մեղավոր են ոչ թե վարունգն ու լոլիկը, այլ ենթաստամոքսային գեղձի ֆերմենտների դեֆիցիտը։ Աղցանի պատճառով նման երևույթներ կարող են գրանցվել նաև աղեստամոքսային տրակտի այլ հիվանդությունների դեպքում, աղցանն այս դեպքում պարզապես ինդիկատոր է։
Եվս մեկ միֆ կապված է այն կարծիքի հետ, թե վարունգն ու լոլիկը չեն համադրվում և միասին դժվար են մարսվում, քանի որ վարունգը ալկալիական մթերք է, իսկ լոլիկը`թթու։ Դա այդպես չէ։ Այս երկու բանջարեղենները նորմալ մարսվում են միմյանց հետ, քանի որ յուրացվում են ոչ թե ստամոքսում, այլ բարակ աղիում։ Ի դեպ, լոլիկը, չնայած թթու համի, ալկալիական մթերք է։
Լոլիկը պարունակում է մագնիում, կալիում, ցինկ, C վիտամին, բետա–կարոտին։ Այն նվազեցնում է քաղցկեղային և սիրտ–անոթաին հիվանդությունների ռիսկը։ Լոլիկը հակացուցված է գաստրիտի և պանկրեատիտի դեպքում։
Վարունգը կատարյալ դիետիկ մթերք է։ Այն պարունակում է քլորոֆիլ, կարոտին, PP, C, B վիտամիններ, կալիում։ Վարունգը խորհուրդ չի տրվում էնտերոկոլիտների դեպքում։–0–
