Քանի՞ ժամ պետք է երեխաներն անցկացնեն ինտերնետում. գիտնականները պարզաբանում են

ԵՐԵՎԱՆ, 2 հունվարի./Նովոստի–Արմենիա/. Մասնագետների կարծիքով, ինտերնետն իսկապես կարող է օգնել երեխաների զարգացման գործում, սակայն ինտերնետում չափազանց շատ ժամանակ անցկացնելը կարող է հանգեցնել հակառակ պրոցեսի, գրում է life.ru–ն` հղում անելով «Կոմերսանտին»։


Ռուս գիտնականները հաշվարկել են, թե անչափահասները որքան ժամանակ պետք է անցկացնեն ինտերնետում`առանց առողջությանն ու մտավոր զարգացմանը վնասելու։ Ուսումնասիրության արդյունքները հրապարակվել են Edcrunch միջազգային կոնֆերանսի ժամանակ, որը նվիրված էր կրթական նորարարություններին։

«5–6 տարեկան երեխաները պետք է ինտերնետից օգտվեն օրական մինչև 1 ժամ, 7–11 տարեկան դպրոցականներն` օրական 1–3 ժամ, 12–13 տարեկանները` 3–5 ժամ», – նշել է ուսումնասիրության հեղինակներից մեկը։

Երեխաները, որոնց ծնողները պահպանում են նշված ժամկետները, ունեն «որոշ կոգնիտիվ ֆունկցիաների զարգացման ավելի բարձր ցուցանիշներ»։ Իսկ եթե երեխան չափազանց երկար ժամանակ է անցկացնում ինտերնետում, ապա դա կարող է հանգեցնել փոքրիկի արդյունավետության նվազման, «հատկապես շարժումների և գործողությունների սերիական կազմակերպման ֆունկցիաներում, լսողական–խոսքային հիշողությունում և պատմվածք կազմելիս»։

Գիտնականների խոսքերով, համացանցից օգտվող երեխաներն ունեն ավելի բարձր առաջադիմություն, քան այն երեխաները, ովքեր ընդհանրապես չեն օգտվում ինտերնետից կամ չափազանց սահմանափակ են օգտվում։

Նշվում է, որ ուսումնասիրությանը մասնակցել է 200 երեխա, որոնց բաժանել են չորս խմբի` ըստ տարիքի և ինտերնետից ու տարբեր գաջեթներից օգտվելու հաճախականության։–0–