Փորձագետը թվարկել է «դելտա» շտամի անսովոր հետևանքները

ԵՐԵՎԱՆ, 1 նոյեմբերի./Նովոստի–Արմենիա/. Մոսկվայի Գաբրիչևսկու անվան համաճարակաբանության և միկրոկենսաբանության գիտահետազոտական ինստիտուտի կլինիկական աշխատանքի տնօրենի տեղակալ Տատյանա Ռուժենցովան ՌՒԱ Նովոստիին տված հարցազրույցում նշել է անսովոր հետևանքները, որոնց հետ բախվում են կորոնավիրուսի «դելտա» շտամով հիվանդացած մարդիկ, գրում է lenta.ru–ն։ 

Նրա խոսքով, վերջին շրջանում բժիշկները սկսել են հաճախ ֆիքսել ավելի վառ արտահայտված հոգնածությունը, ձայնի փոփոխությունը, հիշողության խանգարումը, կոգնիտիվ ֆունկցիաների նվազումը` ըմբռնողականությունը, աշխատանքային գործընթացներին մասնակցելու ունակությունը, ինչպես նաև գրանցվում է լսողության խախտում և աղեստամոքսային խանգարումներ։ Բացի այդ, ավելի վառ արտահայտված է դարձել թոքերի և սրտի ախտահարումը, ինչպես նաև ավելացել է այլ ինֆեկցիաների նկատմամբ ընկալունակության մակարդակը։

Համաճարակաբանը նշել է, որ հետկովիդային սինդրոմը կարող է զարգանալ նույնիսկ այդ մարդկանց մոտ, ովքեր թեթև են հիվանդացել։ Ռուժենցովայի խոսքով, հիվանդության թեթև ընթացքի դեպքում մարդիկ, որպես կանոն, չեն դիմում բուժօգնության։ Ընդ որում, որքան ծանր է ընթանում հիվանդությունն, այնքան ավելի վառ են արտահայտված այդ ախտանիշերը։–0–