Պարզվել է միկրոալիքային վառարանի նոր վտանգը

ԵՐԵՎԱՆ, 23 հունիսի. /Նովոստի Արմենիա/. Ակուստիկայի գծով ամերիկացի մասնագետներն ապացուցել են, որ միկրոալիքային վառարանում տաքացված խաշած ձուն կարող է պայթել`առաջացնելով ծանր այրվածքներ։

 Ինչպես գրում է lenta.ru-ն, այս մասին հայտնում է The Mirror-ը:

Հում ձուն պայթում է, երբ այն փորձում ես պատրաստել միկրոալիքային վառարանում: Նույնը կարող է տեղի ունենալ մաքրած ու խաշած ձվի հետ:

Սան Ֆրանցիսկոյի ֆիզիկոսները սկսեցին հետաքրքվել այս թեմայով այն բանից հետո, երբ դատարան դիմած` ռեստորաններից մեկի հաճախորդը հայտնել է, որ  ստացել է լուրջ այրվածքներ ու կորցրել է լսողությունը, երբ բերանում ձու է պայթել: Աղբյուրը չի մանրամասնում` երբ ու որ դատարան է դիմել քաղաքացին: 

Փորձարկման ժամանակ ձվերը զգուշորեն խաշել են գոլորշու վրա, հետո տեղադրել միկրոալիքային վառարանում: Ձվերից 30 տոկոսը պայթել է այն բանից հետո, երբ դրանք փորձել են հանել սուր առարկայի միջոցով: Սակայն մասնագետները կարծում են, որ նման պայթյունից լսողության կորուստը քիչ հավանական է։

Գիտնականների կարծիքով, պայթյունը տեղի է ունենում այն պատճառով, որ խաշած ձվերի դեղնուցում կան ջուր պարունակող խոռոչներ, որոնք գերտաքանում են։–0–