Մյունխենի օդանավակայանում մաքսային ծառայողները հայ կնոջ են կանգնեցրել` ամուսնու աճյունն ուղեբեռում

ԵՐԵՎԱՆ, 4 օգոստոսի./Նովոստի–Արմենիա/. Մյունխենի օդանավակայանում մաքսային ծառայողները 74-ամյա հայ կնոջ են կանգնեցրել, ում ուղեբեռում ամուսնու աճյունն էր:


Ինչպես հաղորդում է news.am–ը, հղում անելով, Bild-ին, գործը քննելու համար ներգրավվել էին մաքսային ծառայության աշխատակիցները, բժիշկ և դատախազ:

Պարզվել է, որ կինն իր 52-ամյա դստեր հետ միասին ցանկանում էր ամուսնու աճյունը տեղափոխել Հայաստան` նրան հայրենի երկրում թաղելու համար: Կինն ինքը Հունաստանից է:

Ըստ փաստաթղթերի` տղամարդը մահացել է 2008-ին և թաղվել է Սալոնիկի մոտակայքում գտնվող իր բնակության վայրում:

Ըստ դաշնային ոստիկանության` փոխադրումն օրինական էր: Պետական դատախազը հանցակազմ չի հայտնաբերել: Ուստի կանանց թույլ են տվել շարունակել ուղևորությունը` աճյունն ուղեբեռում:–0–