ԵՐԵՎԱՆ, 5 ապրիլի./Նովոստի–Արմենիա/. Ռուսաստանում բնակվող մանկավարժ Լուսինե Ջանգիրյանը ներառվել է աշխարհի լավագույն մանկավարժների 50–ակում` ըստ Global Teacher Prize մրցանակի և, հնարավոր է, շահի 1 մլն դոլար, գրում է
«Կոմերսանտը»։
Ջանգիրյանն ընտրվել է աշխարհի 140 երկրներում ներկայացված 12 հազար թեկնածուներից։ Նա դասավանդում է անգլերեն Կրասնոյարսկի երկրամասի Աչինս քաղաքի թիվ 8 միջնակարգ դպրոցում։
«Ես չեմ ուզում լինել սովորական, միօրինակ ուսուցիչ։ Դասերի ժամանակ տեսնում եմ, որ երեխաներին շատ է դուր գալիս իմ մոտեցումը, նրանց աչքերն առկայծում են», – նշել է Լուսինեն։
Ջանգիրյանն իր աշակերտներին թույլ է տալիս օգտվել բջջային հեռախոսներից, խաղալ հավելվածներով, շարժել դպրոցական նստարանները և բարձր ծիծաղել` նշելով, որ այդ ամենը «ստեղծում է հուզական բարենպաստ կրթական մթնոլորտ»։
Աչինսկի աշակերտները Skype–ով զրուցում են օտարերկրյա հասակակիցների հետ, նրանց նամակներ են գրում և անգամ այցելում հյուր` Հնդկաստան, Թայվան։
«Մեր ժամանակ չկային նման հնարավորություններ։ Հիմա էլ` տեխնոլոգիաների դարաշրջանում, ոչ բոլոր մանկավարժներն են այսպես անում, քանի որ այս գործում ներդնում ես քո ամբողջ անձնական ժամանակը», – նշում է ուսուցչուհին։
Ջանգիրյանը չի ափսոսում իր ժամանակը, գործարկել է սեփական նախագիծը, որը միավորում է բոլոր մայրցամաքների դպրոցականներին և մանկավարժներին։
Չորս տարի առաջ նա զեկույցով ելույթ է ունեցել Ռեդֆորդի համալսարանի կրթական կոնֆերանսի շրջանակում, երկու տարի առաջ ճանաչվել է
«Նորարար մանկավարժ» միջազգային մրցանակի հաղթողներից մեկը։ Իսկ այս տարվա հոկտեմբերին` եզրափակչում, լրջորեն պայքարելու է մանկարժական «նոբելյան» մրցանակի համար ոչ միայն 1 մլն դոլարի համար, այլև, ինչպես համառ Լուսինեի մասին ասել է համաշխարհային մրցանակի հիմնադիրը, որպեսզի «բոլորի ուշադրությունը գրավի այն անհավանական աշխատանքի վրա, որն ամբողջ աշխարհի մանկավարժները կատարում են ամեն օր»։–0–
