Կորոնավիրուսի բռնկման օջախ համարվող չինական Ուհան քաղաքում է գտնվում ՀՀ 3 քաղաքացի. ԱԳՆ

ԵՐԵՎԱՆ, 26 հունվարի./Նովոստի–Արմենիա/. Չինաստանում ՀՀ դեսպանության կողմից շարունակ քայլեր են ձեռնարկվում Չինաստանի տարածքում գտնվող ՀՀ քաղաքացիների հետ անմիջական կապ հաստատելու ուղղությամբ, նշվում է ՀՀ արտաքին գործերի նախարարության Facebook–յան էջում։

«Դեսպանությունն անմիջական կապի մեջ է Հուբեյ նահանգի Ուհան քաղաքում ներկայումս գտնվող երեք ՀՀ քաղաքացիների հետ։ Այս պահի դրությամբ վարակվածների շրջանում ՀՀ քաղաքացիների մասին տեղեկատվություն չկա»,– նշվում է հաղորդագրության մեջ։

ԱԳՆ–ն կոչ է անում Չինաստանում բնակվող ՀՀ բոլոր քաղաքացիներին իրենց հեռախոսահամարները և բնակության հասցեները ուղարկել ՀՀ դեսպանության էլեկտրոնային հասցեին`[email protected]։

Դեկտեմբերին Չինաստանի Ուհան քաղաքում գրանցվել է թոքաբորբի բռնկում։ Ավելի ուշ հայտնի դարձավ, որ հիվանդության պատճառը կորոնավիրուսի անհայտ տեսակն է։

Հիվանդության առանձին դեպքեր են գրանցվել Չինաստանի սահմաններից դուրս` Հարավային Կորեայում, Ճապոնիայում, Թաիլանդում, Ավստրալիայում, Մալայզիայում, ԱՄՆ–ում, Վիետնամում և Սինգապուրում։ 

Ինչպես հաղորդում է ՏԱՍՍ–ը, հղում անելով ՉԺՀ–ի շրջանների հիգիենայի և առողջապահության հարցերի կոմիտեին, Չինաստանում նոր տիպի կորոնավիրուսի հետևանքով առաջացած թոքաբորբի հաստատված դեպքերը կիրակի օրվա դրությամբ արձանագրվել են 2002 մարդու մոտ։ Մահացու դեպքերի թիվը 56–ն է։–0–