Կալուգայում ՃՏՊ–ի հետևանքով տուժած հայերը դուրս են գրվել հիվանդանոցից

ԵՐԵՎԱՆ, 5 փետրվարի. /Նովոստի–Արմենիա/. Փետրվարի 3–ին ՌԴ Կալուգայի մարզում գրանցված ՃՏՊ–ի հետևանքով տուժած ՌԴ հայազգի քաղաքացիներ Մարիա Առաքելյանը (ծնված` 2008թ.) և Սոնա Ադամյանը (ծնված` 1988թ.) դուրս են գրվել հիվանդանոցից։

Այս մասին նշված է ՌԴ–ում ՀՀ դեսպանատան Facebook–յան էջում։

«Հաղորդում ենք, որ դեսպանատան ճշտված տվյալներով, Կալուգայի մարզում գրանցված ՃՏՊ–ի հետևանքով տուժած ՌԴ հայազգի քաղաքացիներ Մարիա Առաքելյանը (ծնված` 2008թ.) և Սոնա Ադամյանը (ծնված` 1988թ.) համապատասխան բուժօգնություն ստանալուց հետո դուրս են գրվել հիվանդանոցից», – նշվում է հաղորդագրության մեջ։

Հիշեցնենք, որ ՃՏՊ–ն տեղի է ունեցել փետրվարի 3–ին Մոսկվայի ժամանակով ժամը 09։15–ին Կալուգա–Վյազմա ճանապարհի 128–րդ կմ–ում։ Ավտոբուսը, որում եղել է 48 մարդ, այդ թվում` 33 երեխա, դուրս է եկել ճանապարհի երթևեկելի գոտուց։ ՃՏՊ–ի հետևանքով զոհերի թիվը հասել է 7–ի, նրանցից 4–ը երեխաներ են։–0–