Հղիներին արժե՞ պատվաստել, թե ոչ. պարզաբանում են փորձագետները

ԵՐԵՎԱՆ, 19 հոկտեմբերի./Նովոստի–Արմենիա/. ԱՄՆ-ում արդեն մոտ 160 000, իսկ Մեծ Բրիտանիայում արդեն մոտ 100 000 հղի պատվաստվել է կորոնավիրուսի դեմ:

Այս մասին այսօր հրավիրված ասուլիսում ասաց Հայկական վերարտադրողական բժշկության ասոցիացիայի նախագահ, Առողջապահության ազգային ինստիտուտի մանկաբարձության և գինեկոլոգիայի ամբիոնի վարիչ Էդուարդ Համբարձումյանը:

Նրա խոսքով՝ որևէ վտանգ կամ բացասական ազդեցություն նրանց մոտ չի գրանցվել:  Հղիները պատվաստվել են հղիության տարբեր ժամկետներում: Նրանցից շատերն արդեն ծննդաբերել են, իսկ վատ ելքերի մասին դեռ ինֆորմացիա չկա:

Երևանի գլխավոր մանկաբարձ-գինեկոլոգ Ռուսուդան Վարդանյանի խոսքով էլ իր մոտ հաշվառված հղիներից միայն մեկն է այս պահի դրությամբ պատվաստված: Նա պատվաստվել է հղիության 22-23 շաբաթից հետո, երբ պտղի ներքին օրգանների զարգացումն արդեն ավարտված էր:

«Դեռևս այդ մեկ դիտարկումն է, որ ես ունեմ, բայց պետք է ասեմ, որ իրեն սփյուռքահայ ամուսինն է հորդորել, որպեսզի պատվաստվի: ԱՀԿ-ն այսօր ասում է, որ հստակ, վերջնական տվյալներ հավաքագրված չեն, բայց հղիներին ևս հորդորում են պատվաստվել, իհարկե՝ ռիսկերը գնահատելով», – ասաց մանկաբարձ-գինեկոլոգը:

Ինչպես իր հերթին նշեց ՀՀ առողջապահության նախարարության մանկաբարձության և գինեկոլոգիայի գծով խորհրդատու Վրույր Գրիգորյանը, պատվաստումը վարակից պաշտպանում է թե´ հղի կնոջը, թե´ նրա երեխային, ում ևս փոխանցվում են պաշտպանիչ հակամարմինները:

«Կան հստակ ցուցումներ, թե որ պատվաստանյութով, ինչ ժամանակահատվածում և որ դեպքերում է պետք պատվաստվել: Եվ այո, ամենամեծ թիվը, որտեղ հղիները պատվաստվել են, դա ԱՄՆ-ն է՝ 160 000: Եվ ամենակարևորն է, որ այդ խումբը պատվաստվել է հղիության տարբեր ժամանակահատվածներում, և որևէ վնասակար ազդեցություն չի գրանցվել», – ասաց մասնագետը:

Փորձագետները նսև նշեցին, որ աշխարհում 250 000-ից ավել հղի է պատվաստվել:–0–