ԵՐԵՎԱՆ, 16 հունիսի. /Նովոստի–Արմենիա/. Ավստրալիայի Վիկտորիա նահանգի համալսարանի գիտնականները պարզել են, որ օրական կես լիտր գարեջրի օգտագործումը 23 տոկոսով ավելացնում է շագանակագեղձի քաղցկեղի զարգացման ռիսկը, հաղորդում է lenta.ru–ն` հղում անելով Daily Mail–ին։
Բժիշկ Թիմ Սթոքուելն ու նրա գործընկերները վերլուծել են այս թեմայով կատարված նախկին աշխատանքներն ու որոշ սխալներ են պարզել։ Իրենց հետազոտության ընթացքում հեղինակները բացահայտել են, որ մեկ բաժակ գարեջրի կամ երկու գավաթ գինու օգտագործումը նպաստում է քաղցկեղի զարգացմանը։
Միաժամանակ շաբաթական անգամ 0,3 լիտր գարեջուրն ավելացնում է այդ հիվանդության զարգացման ռիսկը։ Սակայն դեռևս պարզ չէ, թե ինչպես է ալկոհոլը նպաստում ուռուցքների աճին։«Ալկոհոլը կապված է քաղցկեղի մի քանի տեսակների հետ, որոնց թվում են կրծքագեղձի և աղիների քաղցկեղը, սակայն այս հետազոտությունը ցույց է տալիս, որ գոյություն ունի կապ ալկոհոլի և շագանակագեղձի քաղցկեղի միջև», – հայտարարել է բժիշկ Ժասմին Ջասթը։ Հետազոտողները զգուշացնում են հատկապես այն մարդկանց, ովքեր չափավոր ալկոհոլ են օգտագործում և կարծում են, թե նրանք ռիսկի տակ չեն։
Ավելի վաղ հաղորդվում էր, որ չնայած զգալի ներդրումներին և նորարարություններին, քաղցկեղի դեմ գոյություն ունեցող նոր դեղամիջոցները, որոնք հավանության են արժանացել վերջին տասը տարվա ընթացքում, կարող են չօգնել հիվանդներին։ Մասնագետների խոսքերով, շատ հիվանդներ ահռելի գումարներ են ծախսում դեղորայքի վրա, որը երկարացնում է կյանքն ընդամենը մի քանի շաբաթով կամ ամսով։–0–