ԵՐԵՎԱՆ, 13 հուլիսի. /Նովոստի–Արմենիա/. D վիտամինը սովորաբար խորհուրդ են տալիս օգտագործել ոսկրային հյուսվածքի աճի համար։ Սակայն Նովատոյում ծերացման խնդիրների ուսումնասիրության Բակայի ինստիտուտի (ԱՄՆ) մասնագետներն առաջարկում են նոր հայացք գցել այս վիտամինին` այն կարող է ազդել կյանքի տևողության և ծերացման հետ կապված խնդիրների զարգացման վրա, գրում է
vokrugsveta.ru գիտահանրամատչելի կայքը։
Դա են ցույց տվել նեմատոդ որդերի (Caenorhabditis elegans) վրա անցկացված գիտափորձերը։
Գորդոն Լիթգոուի ղեկավարությամբ մի խումբ գիտնականներ փորձերի ընթացքում եզրակացրել են, որ D վիտամինը փոխազդում է երկարակեցության գեների հետ և դանդաղեցնում է սպիտակուցների ծերացման գործընթացը։
Մի շարք հիվանդություններ կապված են սպիտակուցների սխալ աշխատանքի հետ։ Որդերի օրինակով գիտնականները պարզել են, որ D վիտամինն ընդունակ է նվազեցնել օրգանիզմում չլուծվող սպիտակուցների առաջացումը։
«Հաշվի առնելով, որ որդերի ու կաթնասունների ծերացման գործընթացները, ենթադրաբար, նույն կերպ են ընթանում, հավանականություն կա, որ D վիտամինի գործողությունը նույն էֆեկտը կունենա նաև մարդկանց վրա»,– նշում է Գորդոն Լիթգոուն։
Հավանականություն կա, որ D վիտամինի պակասն ազդում է ծերացման արագության վրա, և մարդու օրգանիզմն ավելի ընկալունակ է դառնում քաղցկեղի և Ալցհայմերի հիվանդության նկատմամբ։
Հետազոտության մեջ նշվում է նաև D վիտամինի պոտենցիալ ազդեցությունը Պարկինսոնի և Հանթինգթոնի հիվանդությունների, ինչպես նաև երկրորդ տեսակի շաքարախտի և սրտի որոշ հիվանդությունների զարգացման վրա։
Մասնագետները նշում են` տարեց մարդիկ հատկապես ենթարկված են վերոնշյալ հիվանդությունների ռիսկին D վիտամինի պակասի պատճառով, քանի որ այդ վիտամինի արտադրումը տարիքի հետ զգալիորեն նվազում է։ Այդ իսկ պատճառով խորհուրդ է տրվում սննդակարգում ընդգրկել D վիտամինով հարուստ սննդամթերք, օրինակ, հավկիթ, կաթնամթերք, ձկնեղեն, վարսակաձացար, մաղադանոս, կարմիր միս, կոշտ պանիրներ և այլն։
Գիտնականները ծրագրում են շարունակել փորձերը մկների վրա և դրական արդյունքի դեպքում կլինիկական փորձարկումներ կատարել մարդկանց մասնակցությամբ։ -0-
