Ծնողները սխալմամբ թաղել են կենդանի դստերը

ԵՐԵՎԱՆ, 26 մայիսի./Նովոստի–Արմենիա/. Հնդկաստանի Գուջարաթ նահանգում ծնողները սխալմամբ թաղել են կենդանի երեխային։


Հաջորդ առավոտյան անցորդը գտել է նորածին աղջկան, որի վրա հող է լցված եղել։ Նա ողջ էր և բղավում էր։ Տղամարդը կանչել է հարևաններին, ովքեր հողի տակից հանել են երեխային ու կանչել ոստիկանություն և շտապ օգնություն։ Չսպասելով բժիշկներին` երկու տղամարդ երեխային տեղափոխել են մոտակա պոլիկլինիկա, գրում է lenta.ru-ն` հղում անելով The Indian Express–ին։

Պոլիկլինիկայի աշխատակիցները ճանաչել են երեխային։ Պարզվել է, որ նրանք նախօրեին ընդունել են երեխայի մոր ծննդաբերությունը։ Փոքրիկը լույս աշխարհ է եկել հղիության 24 շաբաթականում, այսինքն սովորական ժամկետից երկուսուկես ամիս շուտ։ Պոլիկլինիկայում չի եղել վերակենդանացման բաժանմունք նորածինների համար, և բժիշկը խորհուրդ է տվել ծնողներին տեղափոխել նորածնին մասնավոր հիվանդանոց։

Ծնողները նշում են, որ ճանապարհին երեխան դադարել է շարժվել, և նրանք մտածել են, որ նորածինը մահացել է ու միանգամից թաղել են։ Փոքրիկին հայտնաբերել են 12 ժամ անց ու տեղափոխել վերակենդանացման բաժանմունք, սակայն 30 ժամ անց նա մահացել է։–0–