4 մթերք, որոնք փոխարինում են միսը
ԵՐԵՎԱՆ, 7 ապրիլի./Նովոստի–Արմենիա/. Վերջերս մի շարք գիտնականներ եկել են այն եզրահանգման, որ Երկիր մոլորակի ռեսուրսները չեն կարող ապահովել աճող բնակչության սնվելու պահանջները, և մարդկությունը գոյատևելու համար ստիպված կլինի հրաժարվել մսից, գրում է medikforum.ru–ն։
Նոր տվյալների համաձաւն, որոնք ներկայացվել են Համաշխարհային տնտեսական համաժողովի շրջանակում, տավարի սպիտակուցի փոխարինումը բուսական սպիտակուցով կնպաստեր ջերմոցային գազերի արտանետման 25%–անոց նվազմանը, իսկ սննդի հետ կապված մահացության 5%–անոց նվազմանը։ Սակայն ինչո՞վ կարելի է փոխարիել միսը։
Եվ այսպես...
Ջրիմուռներ
Մարդկանց մեծ մասը կարծում է, որ ջրիմուռը պարզապես խոտ է և որևէ սննդարար նյութ չի պարունակում։ Միաժամանակ, ըստ The Lancet–ի հրապարակման, իրենց սննդարար ներուժով ջրիմուռները չեն զիջում հավի ձվին, դրանք հագեցնում են և լավ յուրացվում օրգանիզմի կողմից։
Լոբի
Հարվարդի համալսարանի գիտնականներն ապացուցել են, որ լոբին ոչ միայն չափազանց սննդարար է, այլև սպիտակուցով հարուստ օգտակար սննդամթերք է։ Գիտնականների տվյալներով, տավարի միսը լոբազգիներով փոխարինելու դեպքում կարելի է արդեն 2020թ.–ին հասնել ջերմոցային գազերի արտանետման նվազմանը։
Միջատներ
Վաղ, թե ուշ մարդիկ միևնույնն է կգան նրան, որ կսկսեն միջատներ ուտել։ Իրականում, միջատները սպիտակուցի հիանալի աղբյուր են, որոնք նաև պարունակում են մեծ քանակի օգտակար ճարպաթթուներ, կալցիում, երկաթ, В խմբի վիտամիններ։ Միջատներն ավելի արագ են մեծանում և բազմանում, ինչպես նաև պահանջում են շատ ավելի քիչ հողատարածք և ջուր, ինչը նրանց արտադրությունը դարձնում է էկոլոգիապես նախընտրելի` անասնաբուծության համեմատ։
Ընկուզեղեն
Ընկույզի ցանկացած տեսակ պարունակում է սպիտակուց, չնայած դրանց տարբեր տեսակները տարբերվում են ճարպերի, վիտամինների և հանքանյութերի պարունակությամբ։ Բացի այդ, ընկուզեղենի աճեցումը կապված է մթնոլորտին սպառնացող ածխաթթվային գազի ավելի քիչ արտադրությամբ` անգամ միջատների համեմատ։–0–
