Արա Աբրահամյանի որդու շքեղ առանձնատունը հանվել է վաճառքի 80մլն դոլարով. այն ՌԴ–ի ամենաթանկ առանձնատունն է (ՎԻԴԵՈ)
ԵՐԵՎԱՆ, 18 սեպտեմբերի./Նովոստի–Արմենիա/. 80 մլն դոլար կամ 6 մլրդ ռուբլի, այսքան են պահանջում Ռուբլյովկայում գտնվող շքեղ առանձնատան համար, որը վերջերս է հանվել վաճառքի։
Բարվիխայի անտառապուրակում գտնվող առանձնատունն ԱՊՀ–ի ամենաթանկարժեք մասնավոր կառույցներից մեկն է և ամենաթանկարժեքը Ռուսաստանում, գրում է «Секрет фирмы»–ին։
Mash Telegram ալիքի հաղորդմամբ, առանձնատան սեփականատերը Ռուսաստանի հայկական սփյուռքի ղեկավար Արա Աբրահամյանի որդին ` Վլադիսլավ Աբրահամյանն է։ Հայտնի չէ, թե ինչու են Աբրահամյանները որոշել վաճառքի հանել այս շքեղ առանձնատունը։
Գնորդներին առաջարկվում է 11 հազար քմ մակերեսով վեց հարկայնի տուն, 2,5 հեկտար հողատարածք, 800 քմ մակերեսով հյուրատուն, ինտերիերի դիզայնի ու նախագծման հեղինակը Angela Luigi հռոմեական տունն է։ Առանձնատունն ունի բարձր առաստաղ, պատուհանից բացվում է գեղատեսիլ տեսարան, կա նաև թենիսի կորտ և մինի գոլֆ, 12 ննջարան` խոհանոցով, սանհանգույցով և հանդերձարանով, լողավազան, մարզադահլիճ, համերգասրահ, բոուլինգ, սպա–համալիր, ձմեռային մեծ այգի։
Վաճառքի հայտարարությունում նշված է, որ առանձնատան ամբողջական հարդարումից հետո այն հավակնում է դառնալ աշխարհի ամենաթանկարժեք առանձնատներից մեկը։ Վաճառողը պատրաստ է սակարկել ու նվազեցնել գինը 3–15%–ով։ Համեմատության համար նշենք, որ Մայքլ Ջեքսոնի հայտնի առանձնատունը, ատրակցիոների այգով, աճուրդում վաճառվեց 32 մլն դոլարով։
«Ռուսաստանի հայերի միության» նախագահ Արա Աբրահամյանն իր կյանքի ընթացքում զբաղեցրել է ԽՍՀՄ էլեկտրոնային արդյունաբերության նախարարության վարչության պետի տեղակալի, «ԿՈՄԵՔՍ» ընկերության գլխավոր տնօրենի, «Согласие» ՓԲԸ–ի նախագահի պաշտոնները, նա «Российские защитные технологии» կոնցեռնի հիմնադիրն է։ «Согласие»–ն 1990–ականներին Կրեմլում շինարարական աշխատանքների հիմնական կապալառուն էր։ Աբրահամյանի բիզնեսն այնքան հաջողված էր, որ նա ներդրումներ է կատարել նաև այլ երկրներում։ Գործարարը Լիբիայի տնտեսության մեջ մինչև քաղաքացիական պատերազմը ներդրել է 1մլրդ դոլար։
1997թ.–ին Օդինովսկու շրջանի ադմինիստրացիայի որոշմամբ, «Բարվիխա» կլինիկական առողջարանի մոտ գտնվող մի քանի հողատարածքներ դարձել են «Согласие»–ի սեփականությունը։ 2004–2005թթ.–ին Մոսկվայի մարզի դատախազությունն ու Ռոսիմուշչեստվոն դիմել են դատարան` գործարքը վիճարկելու նպատակով, որով ընկերությունը ձեռք է բերել առողջարանի հողատարածքները 2,75 մլն ռուբլով (առնվազն 100 000 դոլարով, այն ժամանակվա փոխարժեքով), սակայն Աբրահամյանը դատարանում պաշտպանել է հողատարածքի նկատմամբ ունեցած իր իրավունքները, որտեղ հետագայում հայտնվել է էլիտար թաղամասը։
Տեսանյութը կարող եք դիտել հետևյալ հղմամբ։–0–
