10 հետաքրքիր փաստ հնդկաձավարի մասին

ԵՐԵՎԱՆ, 30 դեկտեմբերի. /Նովոստի-Արմենիա/. Հնդկաձավարը բացառիկ մշակաբույս է, որի հայրենիքը համարվում են Հնդկաստանի և Նեպալի լեռնային շրջանները, որտեղ այն սկսել են մշակել մոտ 4 հազար տարի առաջ: 

Edimdoma.ru կայքը ներկայացնում է 10 հետաքրքիր փաստ հնդկաձավարի մասին, որոնք, հնարավոր է, հայտնի են ոչ բոլորին:

1. Հնդկաձավարը սպիտակուցի հիանալի աղբյուր է



Անփոխարինելի ամինաթթուների պարունակությամբ հնդկաձավարի սպիտակուցը մոտ է կենդանական ծագման սննդամթերքներին և այդ պատճառով համարվում է մսի համարժեք փոխարինող: Միաժամանակ, շատ ավելի դյուրամարս է:

2. Հնդկաձավարը կանոնավորում է արյան մեջ շաքարի պարունակությունը



Հնդկաձավարի շիլա ուտելուց հետո շաքարի մակարդակը դանդաղ է բարձրանում, այլ ոչ թե թռիչքաձև, ինչպես այլ ածխաջրերի օգտագործման դեպքում:

3. Հնդկաձավարն էկոլոգիապես մաքուր մթերք է



Սա թերևս միակ մշակաբույսն է, որը չի հաջողվել գենետիկորեն վերափոխել: Հնդկաձավարում նիտրատներ, պեստիցիդներ և հերբիցիդներ չկան: Այն հիանալի աճում է առանց պարարտանյութերի:

4. Հնդկաձավարը տրամադրություն է բարձրացնում



Ապացուցված է, որ հնդկաձավարի շիլան հանգեցնում է հոգեհուզական վիճակի, գլխուղեղի աշխատանքի և տրամադրության բարելավման:

5. Շաքարը չեզոքացնում է հնդկաձավարի օգտակար հատկությունները



Հնդկաձավարը չի կարելի խառնել շաքարի հետ: Ցավոք, շաքարը չեզոքացնում է հնդկաձավարի բոլոր օգտակար հատկությունները:

6.Հնդկաձավարն օգնում է դուրս բերել վատ խոլեստերինը



Այս ձավարն օրգանիզմից դուրս է բերում վնասակար խոլեստերինը, ինչը հատկապես կարևոր է տարեցների համար: Տարիքի հետ անոթներում ավելանում են խոլեստերինային կուտակումները, ինչը հանգեցնում է անոթների անանցանելիության, ուղեղի արյան շրջանառության նվազման և ավելի լուրջ հետևանքների:

7. Հնդկաձավարը գերազանց հատիկավոր է դիետա պահողների համար



Հնդկաձավարն անփոխարինելի է այն մարդկանց համար, ովքեր դիետա են պահում: Չնայած իր կալորիականությանը՝ այս հատիկավորը պարունակում է 1,5-3 անգամ ավելի օգտակար վիտամիններ և տարրեր, քան մյուս հատիկավորներում: Այն լավ է դուրս բերում հեղուկն օրգանիզմից, մաքրում է օրգանիզմը և արագացնում նյութափոխանակությունը:

8. Կանաչ հնդկաձավարի ծիլերը շատ օգտակար են



Շատ օգտակար են հնդկաձավարի ծիլերը, որոնք կարելի է աճեցնել տանը և օգտագործել աղցաններում և ապուրներում: Հնդկաձավարի այսպիսի օգտագործումը նվազեցնում է սրտի, արյունատար անոթների, աղեստամոքսային տրակտի, վահանաձև գեղձի հիվանդությունների ռիսկը:

9. Հնդկաձավարը բարձրացնում է մրսածության նկատմամբ օրգանիզմի կայունությունը



Հնդկաձավարը հարուստ է ֆոլաթթվով, որը նպաստում է օրգանիզմի ընդհանուր կայունությանն արտաքին միջավայրի գործոնների նկատմամբ:

10. Հնդկաձավարը հարուստ է երկաթով



Հնդկաձավարում երկաթի առկայությունը շատ օգտակար է անեմիայով տառապող մարդկանց համար: -0-