Շարունակում ենք ուռացնել. պարզվել է բոտոքսի անսպասելի հատկությունը

ԵՐԵՎԱՆ, 30 դեկտեմբերի./Նովոստի–Արմենիա/. Բոտոքսը, որն ավանդաբար օգտագործվում է կնճիռները հարթեցնելու համար և մկանների լարվածության հետ կապված նյարդային հիվանդությունների բուժման ժամանակ, ունի ևս մեկ անսպասելի հատկություն։

Այս մասին նշվում է Fashionista.com ամերիկյան ամսագրում, հաղորդում է life.ru–ն։

Դիմահարդարների խոսքերով, բոտոքսի ներարկումները նվազեցնում են վերնամաշկում մաշկաճարպի արտադրման մակարդակը և վերացնում են ճարպային փայլը, որը հատկապես տեսանելի է քթի, կզակի և ճակատի (հոնքերի վերևի հատվածը) վրա։ 

Միաժամանակ մկանների կաթվածահարության հետևանքով հիվանդի մոտ նվազում է քրտնարտադրությունն այն հատվածներում, որտեղ բոտոքս է ներարկվել։ 

Դիմահարդարները, սակայն, նշում են, որ չի կարելի չարաշահել բոտոքսը, քանի որ դրա ներարկումները կաթվածահար են անում դեմքի մկանները (ինչով էլ բացատրվում է քրտնարտադրության ու մաշկաճարպի նվազումը), ինչի պատճառով նման ներարկումները կարող են բացասաբար ազդել միմիկայի վրա։–0–