ԵՐԵՎԱՆ, 25 հուլիսի. /Նովոստի–Արմենիա/. Ռուսաստանաբնակ ռեժիսոր Արիկ Մանուկյանին կալանավորել են Աբու Դաբիում շեյխ Զայդայի մզկիթի հարևանությամբ դրոնով նկարահանում կատարելու համար։ Այս մասին երեքշաբթի հաղորդել է
«Կոմերսանտը»։
«Ռեժիսորն ԱՄԷ էր մեկնել ծանոթների համար հարսանեկան հոլովակ նկարահանելու համար։ Անօդաչու սարքի չարտոնագրված օգտագործման համար նրան սպառնում է խոշոր չափի տուգանք կամ մի քանի ամսվա ազատազրկում»,–գրում է պարբերականը։
Загружается новость ... "Лево"
Անվտանգության աշխատակիցները իջեցրել և առգրավվել են դրոնը։ Իսկ մի քանի ժամ անց հայտնվել են ոստիկանության աշխատակիցները, ովքեր բերման են ենթարկել Մանուկյանին, նրա եղբորը և փեսայի հարազատներին։
«Այստեղ երեքին էլ հարցաքննել են, վերցրել անձնագրերը և հեռախոսները, ինչից հետո նրանց տեղափոխել են բանտախուց, որտեղ նրանք 6 օր են անցկացրել։ Ընդ որում ձերբակալվածներն այդ ընթացքում չեն կարողացել կապվել ո′չ հարազատների, ո′չ Ռուսաստանի հյուպատոսության և դեսպանատան աշխատակիցների հետ»,–գրում է պարբերականը։
Ռուսաստանի դեսպանության միջամտությունից հետո կալանավորներին բաց են թողել` արգելելով լքել երկիրը։
«Այս ընթացքում ինձ 2 անգամ հարցաքննել են։ Որքան հասկացա, մեզ մեղադրում են նրանում, որ մենք ոչ միայն առանց թույլտվության նկարահել ենք մզկիթը, այլև հարևանությամբ գտնվող օդանավակայանը, բայց նման բան չի եղել»,–վստահեցնում է ռեժիսորը։
Այս պահին ռուս դիվանագետներն անում են հնարավորը` ստեղծված իրավիճակին լուծում տալու համար։
ԱՄԷ-ի իշխանությունները բացասաբար են վերաբերվում չարտոնագրված դրոնների օգտագործմանը։ Դուբայում նման սարք անհնար է գնել առաց համապատասխան արտոնագրի, ինչպես նաև առանց անօդաչու սարքերի կառավարման հատուկ դասընթացներ անցնելու։ Արգելված է նաև նման սարքն օգտագործել նկարահանումների համար առանց տեղական իշխանությունների թույլտվության։ Կանոնների խախտման համար նախատեսվում է տուգանք 50 հազար դոլարի չափով, ինչպես նաև վարչական կալանք։-0-