ԵՐԵՎԱՆ, 28 դեկտեմբերի. /Նովոստի–Արմենիա/. ՀՀ ԱՆ առողջապահական պետական տեսչության Հիգիենայի բաժնի գլխավոր մասնագետ Լիլիթ Հունանյանը երկուշաբթի նշել է Ամանորին սննդային թունավորման հիմնական պատճառները։
Նրա խոսքով` տոներին սննդային թունավորման հիմնական պատճառն աղցաններն են։
««Ռիսկի խմբում» են նաև միսն ու մսամթերքը, կաթը, կաթնամթերքը, պատրաստի ճաշատեսակները, ձուկն ու ձկնամթերքը», – նշեց Հունանյանը։
Նա ավելացրեց, որ այս մթերքներն անհրաժեշտ է պահել համապատասխան պայմաններում։
Արագ փչացող մթերքները պետք է անպայման պահել սառնարանում։
«Օրինակ, ընդունված նորմերով, մայոնեզով կամ թթվասերով աղցանները թույլատրվում է պահել սառնարանում 6 ժամից ոչ ավել, իսկ առանց մայոնեզի և թթվասերի աղցանները` 12 ժամից ոչ ավել», – ընդգծեց Հունանյանը։
Նա նաև ավելացրեց, որ տոնական օրերին չպետք է չարաշահել ալկոհոլը, գազավորված և էներգետիկ ըմպելիքները։ Նրա խոսքով` յուղոտ կերակուրների հետ խորհուրդ չի տրվում օգտագործել ալկոհոլ, ինչպես նաև օսլա պարունակող մթերքներ։
«Բարեբախտաբար, նախորդ տարի տոնական օրերին սննդային թունավորման դեպքեր չեն գրանցվել։ Արձանագրվել էին միայն աղեստամոքսային խանգարման դեպքեր», – նշեց Հունանյանը։
Նա նշեց, որ սննդային թունավորումներ կարող են առաջանալ նաև տարբեր մթերքներ օգտագործելու դեպքում։
«Այդ պատճառով ես խորհուրդ եմ տալիս մթերքներն օգտագործել առանձին, փոքր չափաբաժնով։ Հարկավոր է խուսափել նաև տնային պայմաններում պատրաստված պահածոների օգտագործումից։ Սակայն, եթե դրանք, այնուամենայնիվ, պատրաստվել և օգտագործվում են, ապա հարկավոր է դրանք եռացնել 20–30 րոպեի ընթացքում», – ավելացրեց Հունանյանը։
Նրա խոսքով` 2015 թ.–ին Հայաստանում գրանցվել է բոտուլիզմի 15 դեպք, ինչի հետևանքով տուժել է 26 մարդ (մահացու դեպք չի գրանցվել), սնկային թունավորման 35 դեպք, ինչի հետևանքով տուժել է 47 մարդ, որից 15–ը` երեխաներ (մահացու երկու դեպք)։ Բացի այդ, անցնող տարում գրանցվել է սուր աղիքային ինֆեկցիայի բռնկման ութ դեպք, որից տուժել է 206 մարդ։
Հունանյանն ընդգծեց, որ 2014 թ.–ի համեմատ` սննդային թունավորումների դեպքերի թիվն
ավելացել է։ Մասնավորապես, 2014 թ.–ին գրանցվել էր բոտուլիզմի 9 դեպք և 11 տուժած,
սնկային թունավորման 27 դեպք և 36 տուժած ու մահացու մեկ դեպք, սուր աղիքային
ինֆեկցիայի 5 դեպք և 21 տուժած։–0–
