ԵՐԵՎԱՆ, 22 սեպտեմբերի./Նովոստի–Արմենիա/. Բրիտանացի գիտնականները պարզել են, որ միջերկրածովյան դիետան նվազեցնում է ուղեղի կաթվածի ռիսկը կանանց շրջանում։ Հետազոտության արդյունքները հրապարակվել են American Heart Association Stroke ամսագրում, գրում է gazeta.ru-ն։
Հետազոտությանը մասնակցել է 40–77 տարեկան 23 հազար մարդ։ 17 տարվա ընթացքում գիտնականները հետևել են այդ մարդկանց սննդակարգին ու հաշվարկել ուղեղի կաթվածի զարգացման ռիսկը։ Արդյունքում պարզվել է, որ միջերկրածովյան դիետային հետևողների մոտ ուղեղի կաթվածի ռիսկը նվազել է միջինը 17%–ով։ Հետազոտության մասնակիցներին բաժանելով ըստ սեռի` գիտնականները պարզել են, որ կանանց մոտ ուղեղի կաթվածի ռիսկը նվազել է 22%–ով, իսկ տղամարդկանց մոտ` ընդամենը 6%–ով։
Загружается новость ... "Лево"
Գիտնականները, սակայն, չեն կարող նշել, թե որն է կանանց և տղամարդկանց արդյունքների նման մեծ տարբերությունը։ Նրանք կարծում են, որ միևնույն մթերքները կարող են տարբեր կերպ յուրացվել կնոջ և տղամարդու օրգանիզմում։ Բացի այդ, կանայք և տղամարդիկ հակված են ուղեղի կաթվածի տարբեր տեսակների։
Միջերկրածովյան դիետայի մեջ ներառվում է մեծ քանակի թարմ բանջարեղեն և միրգ, ձկան, թռչնամսի և ձվի չափավոր քանակ, ինչպես նաև կարմիր մսի նվազագույն քանակ։–0–
