Ինչպե՞ս չսխալվել Ամանորյա զեղչերի ժամանակ. 7 խորհուրդ

ԵՐԵՎԱՆ, 29 դեկտեմբերի. /Նովոստի–Արմենիա/. Դեկտեմբերը զեղչերի, ակցիաների ժամանակաշրջան է։ Չէ՞ որ առջևում տարվա գլխավոր իրադարձությունն է` Ամանորը։ Իսկ դա նշանակում է, որ գալիս է նվերների ժամանակը։ Այսօր գրեթե յուրաքանչյուր խանութում գործում են գայթակղիչ առաջարկներ, որոնք ստիպում են մեզ գումար ծախսել և ուրախացնել հարազատներին նվերներով։ Սակայն ոչ բոլորն են կարողանում ճիշտ կողմնորոշվել առաջարկների այդ անեզր ծովում։ 

Գոյություն ունեն մի շարք հնարքներ, որոնք օգնում են խանութների տերերին գնորդներ գրավել` միաժամանակ վաստակելով գումար։ «Նովոստի–Արմենիա» գործակալությունը ներկայացնում է ամենատարածված հնարքները զեղչերի և ակցիաների ժամանակ, ինչպես նաև տալիս է 7 օգտակար խորհուրդ` դրանցից խուսափելու համար։

Ի՞նչ է կարևոր իմանալ զեղչերի և ակցիաների մասին



Զեղչերն ու ակցիաներն առաջին հերթին նախատեսված են իմպուլսիվ և տպավորվող մարդկանց համար։ Նման մարդիկ արագ արձագանքում են գովազդին, որը խոստանում է զեղչեր, մրցանակներ ու բոնուսներ։ Առևտրականները շահավետ խաղադրույք են կատարում մարդկային սովորական ցանկության վրա`ծախսել ավելի քիչ ու ստանալ ավելի շատ։

Ի՞նչ հնարքներ են ավելի հաճախ մեզ գրավում


«Երկու իր մեկի գնով» առաջարկից շատ դժվար է հրաժարվել, այն չափազանց գայթակղիչ է թվում։ Սակայն իրականում կարելի է նկատել, որ խոսքը պահանջարկ չվայելող իրերի մասին, ընդ որում դրանց ընտրությունը բավականին սահմանափակ է։ Արդյունքում, մենք գնում ենք ինչ–որ անպետք իր բավականին բարձր գնով և դրան ավելանում է ևս մեկ անպետք իր։ 

Երկրորդ հնարքն ապրանքի գնապիտակի վրա երկու գնի առկայությունն է։ Առաջին գինը ցուցադրաբար ջնջված է, իսկ կողքը գրված է երկրորդ` ավելի ցածր գինը։ Մենք անգամ չենք էլ կռահում, որ առաջին գինը հաճախ ուռճացված է` աստղաբաշխական, իսկ երկրորդն ամենևին էլ շահավետ ու ցածր չէ։ Ավելորդ գումար չծախսելու համար ձեզ հաճախ հիշեցրեք, որ զեղչերը հիմնականում սովորական գովազդային ակցիաներն են, որոնք օգնում են գնորդ գրավել։ 

Հայտարարություններ զեղչերի մասին բացառապես գնորդների ուշադրությունը գրավելու համար: Մեխանիզմը բավականին պարզ է: Գնորդը, խանութ մտնելով, տեսնում է, որ գներն իսկապես իջեցված են, բայց միայն որոշ ապրանքների համար, որոնք այդքան էլ պահանջարկ չեն վայելում: 

Իսկ հետո միանում է հետաքրքրությունը, քանի որ դարակներում դրված են բազմաթիվ այլ հետաքրքիր իրեր, բայց բավականին բարձր գներով: Գործն ավարտին է հասցնում բավականին բարեհաճ վաճառողը, ով սկսում է պատմել սեզոնի բոլոր հիանալի նորույթների մասին, ինչից հետո առանց գնում կատարելու հեռանալը պարզապես անհարմար է դառնում: Արդյունքում փողերը ծախսվում են թանկ իրերի վրա:

Եվս մեկ հնարք` խանութների ցուցափեղկերին ընդամենը 1-2 օր տևող իջեցված գներով վաճառքի (распродажа) հայտարարությունները: Հենց այդքան օր էլ կգործի բավականին լավ զեղչ։ 

Արդյունքում մարդը չի դիմանում գայթակղությանը և գնում է մի ապրանք, որ նրան այդքան էլ պետք չէ ու այդքան էլ բարձրորակ չէ։ Իսկ գալով նույն խանութ մեկ ամիս անց` զարմանքով հայտնաբերում է, որ իսպառ վաճառքը չի էլ վերջացել։ Այդ իսկ պատճառով պետք է կուրորեն վստահել «մեկօրյա զեղչեր» կամ «լիկվիդացիոն գներ» հայտարարություններին։ 

Յոթ խորհուրդ, թե ինչպես չգնել ավելորդը



Գաղտնիք չէ, որ վաճառողը երբեք իրեն ի վնաս չի աշխատի, նույնիսկ 70 և 90%-ի զեղչերի դեպքում: Կասկած չկա, որ խանութը, միևնույն է, կստանա իր շահույթը: Պարզապես դա նշանակում է, որ գինն ի սկզբանե շատ բարձր է եղել: Զեղչերով վաճառքի ժամանակ հաճախ դրվում է իրերի իսկական գինը` առանց աստղաբաշխական թվերի:

Սակայն գրագետ մոտեցման դեպքում կարելի է իսկապես տնտեսել և այդ բոլոր առևտրային հնարքներն օգտագործել հօգուտ սեփական գրպանի:

1. Խանութ գնալուց առաջ կազմեք իսկապես պետքական ապրանքների ցուցակը։ «շատ էժան պետքական իր» գնելուց առաջ նայեք այդ ցուցակը։ Իսկ երբ գնում եք տոնական զեղչային գնումների` նախապես գրեք, թե ինչ և ում համար պետք է գնեք։

2.Փողը քամուն չտալու և չմտածված գնում չկատարելու համար պարզապես սպասեք 10-15 րոպե։ Եթե ինչ–որ ապրանք ձեզ հետաքրքրել է, մի շտապեք այն միանգամից գնել, անցեք այլ բաժիններով, այնուհետև վերադարձեք ու կրկին նայեք ընտրած ապրանքը։ Եվ եթե այն ձեզ նույնքան գրավիչ թվա, որքան սկզբում, հանգիստ խղճով գնեք այն։

3. Մի շտապեք ու ուշադրություն դարձրեք որակին սեզոնային զեղչերի ժամանակ ինչ-որ իր գնելիս: Դա կարող է լինել ինչ-որ իր, որը տարիներով պահված է եղել խանութների պահեստներում: Բացի դրանից, էջան գներով կարող են վաճառվել նաև թերություններով իրեր, որոնց մասին «մոռացել են» հայտնել հաճախորդին:



4. Եթե խոսքը թանկարժեք գնումների մասին է, կրկին մի շտապեք, եթե անգամ գինը ձեզ շատ մատչելի է թվում: Անմիտ գնումների հսկայական մասը կատարվում է ինքնաբուխ, ագրեսիվ գովազդի ազդեցության տակ: Լսելով վաճառողներին` դուք կարող եք ոչ միայն անմիտ փող ծախսել, այլ նաև երկար ժամանակով փչացնել ձեր իսկ տրամադրությունը: Մի փորձեք գնել գերժամանակակից, լավ գովազդ արված իր, դրանք շուտ են ոչ նորաձև դառնում: Գնեք դասական իրեր, որոնք միշտ պահանջված կլինեն:

5. Միշտ հիշեք, որ դուք պետք է օգուտ քաղեք զեղչից ու տնտեսեք, ոչ թե անիմաստ ծախսեք: Խելացի եղեք և թույլ մի տվեք, որպեսզի ձեզ խաբեն: Մի կորցրեք մտքի սթափությունը, մի ընկեք ընդհանուր էյֆորիայի մեջ: Ոչինչ չպետք է շեղի ձեզ նպատակից. ոչ` նվերները, ոչ` գովազդային խոստումները: Ոչինչ չպետք է ստիպի ձեզ գնել ոչ պետքաքան իր կամ ծախսել ավելի շատ, քան դուք նախատեսել եք: 

6. Եթե զեղչերի ժամանակ դուք տեսնում եք սովորական գներ, ապա եզրակացություն արեք, որ սովորաբար գները տվյալ խանութում ավելի բարձր են դնում, և շրջանցեք այն: Ձեզ պարտավոր մի զգացեք գնել ինչ-որ բան միայն նրա համար, որ սիրալիր ու ժպտերես վաճառողն իր թանկարժեք ժամանակից մի քանի րոպե է հատկացրել ձեզ: Շփումը հաճախորդների հետ նրա աշխատանքն է, ինչի համար նա փող է ստանում: 

7. Եվ հիշեք, որ զեղչը բավարար առիթ չէ ապրանք գնելու համար: Որպես առիթ պետք է հանդիսանա տվյալ ապրանքի անհրաժեշտության մակարդակը ձեզ համար: Դուք պետք է ստանաք ոչ թե ուղղակի ուրախություն, կապված ապրանքի ցածր գնի հետ, այլ ապրանքի, որը երկար կծառայի ձեզ և օգտակար կլինի։ -0-