Հայտնաբերվել է շոկոլադի նոր ու շատ օգտակար հատկություն

ԵՐԵՎԱՆ, 29 սեպտեմբերի. /Նովոստի–Արմենիա/. Փորձագետները եկել են այն եզրահանգման, որ կակաո պարունակող մթերքները D2 վիտամինի մեծ աղբյուր են։ 

Կակաո պարունակող տարատեսակ մթերքներն ունեն D2 վիտամինի տարբեր պարունակություն։ Ամենից շատ D2 կա կակաոյի յուղում և մուգ շոկոլադում, ամենաքիչը` սպիտակ շոկոլադում, գրում է livekuban.ru–ն` հղում անելով «Իզվեստիային»։

D3 վիտամինն արտադրվում է մարդու մաշկի վրա արևի ազդեցության ներքո և բավարարում է օրգանիզմի պահանջների 90%–ը։ Նրա մնացած մասը յուրացվում է մթերքի, օրինակ` յուղոտ ձկան կամ հավի ձվի միջոցով։ 

D2 վիտամինը հանդիպում է սնկերում, սակայն շատ մարդիկ ունեն D2–ի պակաս։ Պարզվում է, որ արևի ճառագայթների տակ կակաոյի հատիկների չորանալուց հետո նրանց մեջ տեղի է ունենում փոխակերպում, ինչի արդյունքում D վիտամինը վերածվում է D2–ի։–0–