Հայտնաբերվել է ձիթապտղի ձեթի նոր օգտակար հատկությունը

ԵՐԵՎԱՆ, 15 ապրիլի. /Նովոստի-Արմենիա/. Չիլիի համալսարանի բժիշկներն իրենց օտարերկրացի գործընկերների հետ միասին հայտնաբերել են ձիթապտղի ձեթի նոր օգտակար հատկությունը։

Ինչպես գրում է Lenta.ru-ն, համապատասխան հետազոտությունը հրապարակվել է Lipids in Health and Disease ամսագրում:

Ձիթապտղի ձեթում առկա հիդրոքսիտիրոզոլը, ինչպես ցույց են տվել մասնագետները, նվազեցնում է սննդի մեջ կենդանական ճարպի չափից շատ օգտագործման բացասական ազդեցությունը: Մասնավորապես, տվյալ նյութն օժտված է հակաօքսիդացնող հատկություններով և պաշտպանիչ ազդեցություն է ունենում լյարդի, սրտի և գլխուղեղի վրա:

Գիտնականները հանգել են նման եզրահանգման` փորձարկումներ կատարելով մկների վրա:

Կրծողներին բաժանել են չորս խմբի, որոնցից մի խմբին տվել են կենդանական ճարպի բարձր պարունակությամբ սնունդ և ձիթապտղի ձեթ: 12 շաբաթ շարունակ նման սննդակարգով սնվելուց հետո ուսումնասիրվել են մկների արյունը և հյուսվածքների նմուշները: Անալիզը ցույց է տվել, որ ձիթապտղի ձեթ օգտագործող մկների արյան մեջ չի ավելացել խոլեստերինի պարունակությունը` ի տարբերություն այն մկների, որոնք միայն կենդանական ճարպ էին կերել։

Մասնագետները հանգել են այն եզրակացության, որ մկների համար ստացված տվյալները ճշմարիտ են նաև մարդկանց համար: Գիտնականները խորհուրդ են տալիս օգտագործել հիդրոքսիտիրոզոլ պարունակող սննդամթերք: -0-