Գողացված բանկային քարտերով կանխիկացվել է մի քանի հարյուր հազար դրամ. ոստիկանություն

Ինչպես հայտնում է ոստիկանության մամուլի ծառայությունը, օրերս ոստիկանության Վանաձոր քաղաքի Տարոնի բաժնում մի կին հաղորդում է տվել, որ անծանոթ մեկը գողացել է իր դրամապանակը, որի մեջ փող ու բանկային քարտեր են եղել՝ գաղտնաբառերով։ Շուտով հնչեց ևս մեկ ահազանգ։ Այս դեպքում գրպանահատության թիրախ էր դարձել մի տղամարդ։ Այս դեպքում ևս գողացված բանկային քարտի հետ գաղտնաբառ կար։ Դեպքից որոշ ժամանակ անց տղամարդու բանկային քարտից կանխիկացվեց 100․000 դրամ։

Ոստիկանության Տարոնի բաժնի քրեական հետախույզները օպերատիվ-միջոցառումների արդյունքում հետքը գտան։ Նրանց տեսադաշտում հայտնվեց Գյումրիի բնակիչ, 37-ամյա մի տղամարդ։ Նրան հայտնաբերելու միջոցառումների ընթացքում Վանաձորում բնակվող մի կնոջ պայուսակից հափշտակվեց 330․000 դրամ։ Օպերատիվ տվյալներ ստացվեցին, որ այս գողությունը ևս կատարել է գյումրեցի տղամարդը։ Նա հայտնաբերվեց ու բերման ենթարկվեց ոստիկանության Տարոնի բաժին։

«Հենց բերման ենթարկվելու օրը ոստիկանությունում հնչեց ևս մեկ ահազանգ․ մի տղամարդու գողացված բանկային քարտով կանխիկացվել էր 273․000 դրամ։ Գաղտնաբառը դարձյալ քարտի հետ էր եղել։ Բերման ենթարկվածը խոստովանեց նաև, որ ժամեր առաջ ինքն է գողությունը կատարել։ Իրավապահները հիմնավոր տեղեկություններ ունեն, որ տղամարդը մենակ չի գործել», - նշվում է տարածած հաղորդագրությունում։

Այս հանգամանքը ամբողջությամբ բացահայտելու նպատակով օպերատիվ-հետախուզական միջոցառումներ և քննչական գործողություններ են իրականացվում։ 
Հարուցվել է քրեական գործք։ Քննությունը շարունակվում է։-0-