ԵՐԵՎԱՆ, 10 փետրվարի. /Նովոստի–Արմենիա/. «Աէրոֆլոտ» ընկերությունը փետրվարի 15–ից խստացնում է վերահսկողությունը ձեռքի ուղեբեռի նկատմամբ։
««Աէրոֆլոտն» ուժեղացնում է վերահսկողությունը ձեռքի ուղեբեռի նկատմամբ «Շերեմետևո» բազային օդանավակայանում և մնացած բոլոր օդային հանգույցներում», – նշվում է ընկերության պաշտոնական կայքում հրապարակված հաղորդագրության մեջ, տեղեկացնում է ՌԲԿ–ն։
Փետրվարի 15–ից ավիաընկերության աշխատակիցներն ու գործակալները մանրամասն զննելու են ինքնաթիռի սրահ անցկացվող իրերը նախաթռիչքային ողջ ընթացակարգերի ժամանակ։
Հաշվառման ժամանակ ուղևորը պետք է ներկայացնի ձեռքի ողջ ուղեբեռը, ինչպես նաև առանց լրացուցիչ վճարի անցկացվող ուղեբեռը, որոնց ցանկը հրապարակված է «Աէրոֆլոտի» կայքում։
Ուղեբեռը լրացուցիչ կստուգվի նստեցման ժամանակ։ Ավիաընկերության աշխատակիցները ստուգելու են ձեռքի ուղեբեռը, որպեսզի այն համապատասխանի տոմսի սակագնով սահմանված չափսերի և քաշի նորմերին։
Եթե ձեռքի ուղեբեռը չհամատասխանի պահանջված պարամետրերին, ուղևորին կխնդրեն ձևակերպել այն որպես հաշվառվող ուղեբեռ։ Եթե դրանից հետո հաշվառվող ուղեբեռի անվճար նորմը գերազանցի, ապա ուղևորը ստիպված կլինի վճարել ավել քաշի համար։ Եթե ուղևորը հրաժարվի վճարել ուղեբեռի տեղափոխման համար, «Աէրոֆլոտն» իրավունք է վերապահում հրաժարվել տեղափոխել ուղևորին։
Ավիափոխադրողը նշում է, որ ձեռքի ուղեբեռի նկատմամբ հատուկ վերահսկողության պատճառը ուղևորների` հաճախակի դարձած բողոքներն են։ Նրանք, մասնավորապես, բողոքում են ինքնաթիռի սրահների դարակներում ոչ բավարար տեղի կապակցությամբ։
«Աէրոֆլոտ» թույլ է տալիս իր ուղևորներին ինքնաթիռի սրահ անցկացնել 10 կգ ձեռքի ուղեբեռ «էկոնոմ» և «կոմֆորտ» դասի ու 15 կգ բիզնես դասի ուղևորների համար։ Միաժամանակ, ձեռքի ուղեբեռի չափսերը չպետք է գերազանցեն 115 սմ–ն` երեք չափսերի դեպքում։ –0–