Աշոցքում բքի հետևանքով ավտոմեքենան ամբողջությամբ հայտնվել է ձյան ծածկի տակ (ԼՈւՍԱՆԿԱՐ)

ԵՐԵՎԱՆ, 15 դեկտեմբերի. /Նովոստի–Արմենիա/. Աշոցքում այս պահին բուք է։

Բքի հետևանքով մեքենան ամբողջությամբ հայտնվել է ձյան ծածկի տակ, Facebook–յան իր էջում գրել է «Հիդրոմետ» ծառայության օդերևութաբանության կենտրոնի պետի տեղակալ Գագիկ Սուրենյանը։

Օդերևութաբանը նաև նշում է, որ Հայաստանում սպասվում է խիստ ցածր ջերմային ֆոն։

Մասնավորապես, , առաջիկա գիշերը կանցնի առանց տեղումների, իսկ դեկտեմբերի 16-ի ցերեկը և 17-ին կրկին կամպի, և հանրապետության առանձին շրջաններում կտեղա թույլ ձյուն:

Դեկտեմբերի 18-ից սկսած կանխատեսվում է եղանակի լիարժեք պարզեցում և մինչև դեկտեմբերի 20-ը՝ առանց տեղումների եղանակ:

Ինչպես նշում է օդերևութաբանը, եղանակի պարզեցումը, ձյան ծածկի առկայությունը, ինչպես նաև արկտիկական ցուրտ օդային հոսանքների բուռն ներհոսքն ու հզոր անտիցիկլոնի առկայությունը կնպաստեն, որ հանրապետությունում ձևավորվի խիստ ցածր ջերմային ֆոն:



Դեկտեմբերի 18-19-ին, հատկապես գիշերները, ջերմաստիճանը կնվազի ևս 8-10 աստիճանով:

Այսպիսով, դեկտեմբերի 18-ի լույս 19-ի գիշերը Շիրակում, Կոտայքում, Արագածոտնի և Վայոց Ձորի լեռնային գոտիներում, Գեղարքունիքում օդի ջերմաստիճանը կհասնի մինչև -30...-35, Արագածոտնի, Կոտայքի և Վայոց Ձորի նախալեռներում՝ -18...-23, Արարատյան դաշտում՝ -18...-20, Լոռիում՝ -25...-30, Տավուշում՝ -15...-20, Սյունիքի նախալեռներում՝ -20...-25, Սյունիքի հովիտներում՝ -12...-17, Արցախում՝ -13...-18 աստիճանի:

Երևանում այդ գիշեր կանխատեսվում է -18...-20 աստիճան ցուրտ։–0–