Ադրբեջանը յուրացրեց տոլման, հիմա էլ թիրախի տակ «Քոչարին» է. ԱԳՆ

30.11.2018, 21:20

Ադրբեջանը յուրացրեց տոլման, հիմա էլ թիրախի տակ «Քոչարին» է. ԱԳՆ–ն մտահոգ է:

ԵՐԵՎԱՆ, 30 նոյեմբերի. /Նովոստի–Արմենիա/. Մտահոգիչ են Ադրբեջանի կողմից ՅՈՒՆԵՍԿՕ-ի հարթակի քաղաքականացման ընդհանուր տենդենցները, հայտարարել է ՀՀ ԱԳՆ մամուլի քարտուղար Աննա Նաղդալյանը` մեկնաբանելով Ադրբեջանի ներկայացրած հայտը, հաղորդում է ՀՀ ԱԳՆ մամուլի ծառայությունը։

Հայտում նշվում է, որ 2017թ-ին ՅՈՒՆԵՍԿՕ-ի մարդկության ոչ նյութական մշակութային ժառանգության ցանկում գրանցվել է Հայաստանի կողմից ներկայացված «Քոչարի. ավանդական խմբապար» հայտը: Իսկ օրերս Մավրիկիոսում ոչ նյութական մշակութային ժառանգության պահպանման հարցերով միջկառավարական կոմիտեի 13-րդ նստաշրջանին ընդունվել է ոչ նյութական մշակութային ժառանգության ցանկում գրանցելու նպատակով Ադրբեջանի կողմից ներկայացված «Yalli (Kochari, Tenzere) traditional dances of Nakhichevan» հայտը:

Загружается новость ... "Лево"

«Ընդգծեմ, որ ըստ Մարդկության ոչ նյութական մշակութային ժառանգության մասին կոնվենցիայի՝ այս կամ այն երկրի կողմից ոչ նյութական մշակութային ժառանգության ցանկում որևէ տարրի վերաբերյալ հայտի գրանցումը չի ենթադրում տարրի հանդեպ սեփականության իրավունք։ Ցանկում տարրը գրանցելիս, ճանաչվում են տվյալ երկրում (կամ բազմազգ հայտերի դեպքում՝ տվյալ երկրներում) տվյալ տարրի մշակութային դրսևորումները և դրանց առանձնահատկությունները», – նշել է Նաղդալյանը։

Загружается новость ... "Лево"

Նրա խոսքով, ըստ ադրբեջանական հայտի՝ կա «Յալլի» տեսակի շուրջ 60 պարատեսակ, որոնք կիրառվել են Նախիջևանում, և դրանց շարքում է նաև քոչարին։

«Այս հարցում առավել մտահոգիչ են Ադրբեջանի կողմից ՅՈՒՆԵՍԿՕ-ի հարթակի քաղաքականացման ընդհանուր տենդենցները, որոնք արդեն տեղ են գտնում ՅՈՒՆԵՍԿՕ-ի աշխատանքային մեթոդների մեջ: ՅՈՒՆԵՍԿՕ-ն, որը ստեղծվել է նպաստելու խաղաղությանը և ժողովուրդների անվտանգությանը՝ մշակույթի միջոցով պետությունների միջև համագործակցության խթանմամբ, այսօր նմանօրինակ քաղաքականացման արդյունքում վերածվում է խնդիրների խորացման հարթակի, և սա պետք է մտահոգիչ լինի կառույցի բոլոր անդամների և ՅՈՒՆԵՍԿՕ Գլխավոր տնօրենի համար», – ասել է Նաղդալյանն` ընդգծելով, որ Հայաստանը բազմիցս է այս իրողությունը, ինչպես նաև Ադրբեջանի կողմից որդեգրված անառողջ մոտեցումները ներկայացրել ՅՈՒՆԵՍԿՕ-ի միջոցառումների ժամանակ։

2017 թ.–ին ՅՈՒՆԵՍԿՕ-ի Միավորված ազգերի Կրթության, գիտության և մշակույթի կազմակերպությունը ոչ նյութական մշակութային ժառանգության ցանկում ընդգրկել է Ադրբեջանի կողմից ներկայացված տոլմա ճաշատեսակի պատրաստման ավանդույթը։ Իր այս որոշմամբ կազմակերպությունը, կարծես, յուղ լցրեց Հայաստանի և Ադրբեջանի միջև` այս ճաշատեսակի ծագման համար մղվող երկարատև պայքարում։–0–

#ԱԴՐԲԵՋԱՆ

#ՅՈՒՆԵՍԿՕ

#ՏՈԼՄԱ

#ՔՈՉԱՐԻ

#ԱԳՆ