Ծերացումն արդեն անցյալու՞մ է

ԵՐԵՎԱՆ, 5 դեկտեմբերի. /Նովոստի-Արմենիա /. Երկարակեցության առաջին դեղամիջոցը 2016 թվականին կփորձարկվի մարդկանց վրա, որի շնորհիվ այնպիսի հիվանդությունները, ինչպիսիք են, օրինակ, Ալցհայմերի և Պարկինսոնի հիվանդությունները, կանցնեն պատմության գիրկը: Հակածերացման հեղափոխական միջոցը թույլ կտա մարդկանց կյանքի տևողությունը հասցնել 120 տարեկանի, գրում է The Telegraph-ը:

Ըստ պարբերականի, միջոցն արդեն փորձարկվել է կենդանիների վրա, իսկ այժմ արդեն մեկնարկել է փորձնական ծրագիր, որը կոչված է պարզելու, արդյո՞ք, այն նույն արդյունավետությունը կունենա մարդկանց վրա:

Ինչպես նշում է The Telegraph -ը, թեև այս ամենը հնչում է որպես գիտաֆանտաստիկ գրականությունից մի հատված, այնուհանդերձ, գիտնականների պնդմամբ, հեղափոխական դեղամիջոցը ոչ միայն երկարացնում է կյանքի տևողությունը, այլև` զգալի բարելավում առողջական վիճակը:

Շվեյցարացի փորձագետ, ծրագրի նախաձեռնողներից մեկը` Գորդոն Լայթգոուն, ասում է, որ «սա հեղափոխական լուծում է, որ չի եղել նախկինում»: Ըստ նրա, բժիշկներն այլևս չեն տանջվի «անհատական մոտեցում և պայմաններ» ստեղծել դեմենցիայի, շաքարախտի և քաղցկեղի պարագայում, այլ անմիջապես կներգործեն ծերացման աղբյուրի վրա:

Գիտական թիմի փոխանցմամբ՝ մետֆորմին կոչվող դեղամիջոցը, որն ի սկզբանե ստեղծվել է շաքարախտի բուժման համար ու բավական մատչելի է, բարեհաջող փորձարկվել է կենդանիների վրա ու դրական արդյունք է տվել դրանց կյանքի տևողությունը երկարացնելու հարցում: Օրինակ` մկների պարագայում դեղամիջոցը 40 տոկոսով երկարացրել է դրանց կյանքի տևողությունը:



Այս արդյունքները տեսնելուց հետո ԱՄՆ-ի իշխանությունները որոշել են թույլ տալ մետֆորմինը փորձարկել նաև մարդկանց վրա:

Աղբյուրը մանրամասնում է, որ մետֆորմինը զգալի ավելացնում է թթվածնային մոլեկուլների քանակը բջիջներում, ինչի շնորհիվ մարդը դառնում է ավելի առողջ, առույգ ու երկարակյաց։

Ինչպես նշում են գիտնականները, «կան բոլոր նախադրյալներն անհնարինին հավատալու համար: Եթե 20 տարի առաջ ծերացումը կենսաբանական հանելուկ էր, ապա այժմ մենք սկսում ենք հասկանալ, թե ինչ է կատարվում»:

Սա կլինի իսկապես հեղափոխական դարաշրջան` ծերացման դեմ պայքարի բնագավառում, հայտնում է պարբերականը: -0-