Տարածաշրջանային աստղագիտական կենտրոնի գրասենյակն է բացվել Բյուրականի աստղադիտարանում

ԵՐԵՎԱՆ, 23 հոկտեմբերի. /Նովոստի-Արմենիա/. Տարածաշրջանային աստղագիտական կենտրոնի գրասենյակն է բացվել Հայաստանի գիտությունների ակադեմիայի Վիկտոր Համբարձումյանի անվան Բյուրականի աստղադիտարանում, ուրբաթ լրագրողներին ասաց Հայաստանի աստղագիտական ասոցիացիայի փոխնախագահ Արեգ Միքայելյանը:

Աստղագիտության միջազգային միության որոշմամբ Բյուրականի աստղադիտարանը ճանաչվել է աստղագիտության տարածաշրջւանային կենտրոն: Աստղադիտարանն ընդգրկվել է նաև ԱՊՀ երկրների նորարարական գործակցության միջպետական ծրագրում:

«Այդ նորությունը ես համարում եմ վերջին տարիներին հայկական գիտության ամենամեծ հաջողությունը: Մեզ շնորհել են տարածաշրջանային աստղագիտական կենտրոնի կարգավիճակ, իսկ միջազգային կազմակերպության ճանաչումն արդեն շատ բան է ասում: Դա նշանակում է, որ մենք համակարգելու ենք աստղագիտության զարգացումը տարածաշրջանում»,- նշեց նա:

Միքայելյանի խոսքով, Հայաստանը դարձել է աշխարհում աստղագիտական ութ տարածաշրջանային կենտրոններից մեկը, որոնց աշխատանքը համակարգում է Քեյփթաունում տեղակայված միջազգային կենտրոնը:


Փորձագետի խոսքով, բազմաթիվ ծրագրված նախագծերի իրագործման համար պահանջվում է պետության ֆինանսական աջակցությունը: Նա նշեց, որ գրասենյակի բացման համար Աստղագիտական միջազգային միությունը 5 հազար եվրո է տրամադրել:


ՀՀԳԱԱ Բյուրականի Աստղադիտարանը հիմնադրվել է 1946 թվականին՝ Աստղադտարանի առաջին տնօրեն Վիկտոր Համբարձումյանի նախաձեռնությամբ։ Այն կառուցված է Արագած լեռան հարավային գեղատեսիլ լանջին։
Աստղադիտարանի գիտական գործունեությունը ուղղված է Տիեզերքում անկայուն երևույթների հետազոտմանը, որի համար նախատեսված են հինգ հիմնական դիտակներ, որոնցից են` աստղադիտարանի խոշորագույն 2,6մ և Շմիդտի 1,0մ հանրահայտ դիտակները։ Աստղադիտարանը որպես ճարտարապետական համալիր՝ բաղկացած հիմնական և օժանդակ կառույցներից, նախագծել է հայ նշանավոր ճարտարապետ Սամվել Սաֆարյանը։

 1998 թվականից Բյուրականի Աստղադիտարանը կրում է Վիկտոր Համբարձումյանի անունը։ Հայաստանի կառավարության որոշմամբ Բյուրականի աստղադիտարանը հայտարարվել է հանրապետության ազգային սեփականություն:
-0-