Սիրած երաժշտությունը լսելը և թմրանյութից ստացած հաճույքը հավասարազոր են

ԵՐԵՎԱՆ, 12 փետրվարի. /Նովոստի-Արմենիա/. Կանադացի գիտնականները պարզել են, թե ինչու է որոշ մեղեդիներ լսելն ուրախություն բերում մարդուն: Պարզվում է, երաժշտություն լսելուց ստացած հաճույքը սեքսով զբաղվելու և թմրանյութ ընդունելու հետ ընդհանուր հիմք ունի: Հետազոտության արդյունքները հրապարակվել են Scientific Reports ամսագրում, դրանց մասին հակիրճ գրում է Live Science-ը, հաղորդում է vokrugsveta.ru-ն:

Հետազոտության ժամանակ կամավորներն ընդունել են նալթրեքսոն՝ նյարդային համակարգի օփիոդային ռեցեպտորների աշխատանքն արգելափակելու համար: Դրանց հիմնական ֆունկցիան օրգանիզմում ցավի զգացումների կարգավորումն է: Սակայն կան պնդումներ, թե այդ ռեցեպտորները դոփամինի հետ զուգընթաց մասնակցում են ուղեղի, այսպես կոչված, պարգևատրման համակարգին՝ առաջացնելով հաճույքի զգացում:

Տասնհինգ կամավորներից յուրաքանչյուրը դեղամիջոցի ընդունումից հետո լսել է սիրված երաժշտական կատարումները: Մեկ շաբաթ անց գիտափորձը կրկնվել է, բայց այս անգամ կամավորները նալթրեքսոնի փոխարեն պլացեբո են ընդունել:

Մեղեդիների ունկնդրման ժամանակ գիտնականները հետևել են փորձի մասնակիցների ռեակցիային՝ գնահատվել են նրանց դիմաշարժումները, շնչառության հաճախականությունը և սրտի ռիթմը: Նրանք նաև լրացրել են հարցաթերթիկ, որտեղ նկարագրել են իրենց հուզական վիճակը:

Նալթրեքսոնի ազդեցությամբ գիտափորձի մասնակիցներն ավելի քիչ հաճույք են ստացել սիրած մեղեդիները լսելիս: Այդ մասին են վկայում ոչ միայն հարցման տվյալները, այլ նաև կամավորների միմիկան: Գիտնականների կարծիքով, առաջին անգամ գիտնականներին հաջողվել է ցույց տալ, որ օփիոդային ռեցեպտորները որոշակի դեր են խաղում երաժշտությունը վայելելիս:
Ավելի վաղ խոսվել էր այն մասին, որ «հաճույքի կենտրոնի» վրա ազդում է սեքսը, սնունդը և դեղորայքը: -0-