ԵՐԵՎԱՆ, 26 մայիսի. /Նովոստի–Արմենիա/. Կանոնավոր մեդիտացիան կարող է նվազագույնի հասցնել տարեց մարդկանց մոտ նեյրոդեգեներատիվ հիվանդությունների ռիսկերը։ Ինչպես հաղորդում է ՌԻԱ Նովոստին, այս եզրակացությանն են հանգել գիտնականները, ովքեր իրենց հետազոտության արդյունքները հրապարակել են Frontiers in Psychology–ում։
Մարդկանց կյանքի տևողությունը վերջին 40 տարում զգալիորեն երկարել է, միաժամանակ մարդու գլխուղեղի տարիքային ծերացման գործընթացը դեռևս չի հաջողվում կանգնեցնել, ինչը տարեց մարդկանց մոտ զգալիորեն ավելացնում է հոգեկան հիվանդությունների և նեյրոդեգեներատիվ փոփոխությունների ռիսկը։
Կալիֆոռնիայի համալսարանի գիտնականները մագնիսառեզոնանսային տոմոգրաֆիայի օգնությամբ հետազոտել են 24–77 տարեկան 28 տղամարդկանց և 22 կանանց գլխուղեղները և զարմանալի եզրակացություններ արել։ Թեև բոլոր մարդկանց մոտ նկատվել է գլխուղեղի մոխրագույնի նյութի քանակի տարիքային նվազում, այնուհանդերձ կանոնավոր կերպով մեդիտացիայով զբաղվող մարդկանց մոտ մոխրագույն նյութի մեծ մասն ավելի լավ է պահպանված եղել։
Գիտնականները նշել են, որ չեն կարող պնդել, թե մեդիտացիայի և գլխուղեղում առկա մոխրագույն նյութի պահպանման մեջ ուղիղ պատճառահետևանքային կապ կա, քանի որ չափազանց շատ են ուրիշ գործոնները, որոնք ազդում են մարդու գլխուղեղի վիճակի վրա, այդ գործոնների թվում են մարդու կենսակերպը, բնավորության գծերը և գենետիկ առանձնահատկությունները։ –0–
