Հայաստանը կմասնակցի Բաքվում կայանալիք օլիմպիադային անվտանգության երաշխիքների տրամադրման դեպքում. նախարար

ԵՐԵՎԱՆ, 11 մայիսի. /Նովոստի–Արմենիա/. Հայ դպրոցականները կմասնակցեն Բաքվում կայանալիք Քիմիայի 47–րդ միջազգային օլիմպիադային միայն պետական մակարդակով անվտանգության երաշխիքների տրամադրման դեպքում, հայտարարեց Հայաստանի կրթության և գիտության նախարար Արմեն Աշոտյանը։

«Առաջնահերթ խնդիրը մեր երեխաների անվտանգությունն է։ Եթե պետական մակարդակով անվտանգության երաշխիքներ չտրամադրվեն, ապա մեր մասնակցությունը Ադրբեջանի պատճառով հարցականի տակ կհայտնվի։ Ավելին, մենք չենք մասնակցի օլիմպիադային», – երկուշաբթի լրագրողներին ասաց Աշոտյանը։

Նրա խոսքերով` Հայաստանն արդեն դիմել  է Ադրբեջանին երաշխիքներ ստանալու հարցով, սակայն պատասխան դեռ չի ստացել։ Եթե Հայաստանը չմասնակցի Բաքվում կայանալիք օլիմպիադային, ապա հայ ուժեղ աշակերտները կզրկվեն օլիմպիադային մասնակցելու հնարավորությունից, դա կարող է նաև հանգեցնել միջազգային օլիմպիադաներին Հայաստանի մասնակցության ժամանակավոր դադարին։

«Որոշել եմ ինքս ուղեկցել երեխաներին, քանի որ դա ճիշտ եմ համարում», – ասաց Աշոտյանը։

Քիմիայի 47–րդ միջազգային օլիմպիադան կանցկացվի Բաքվում հուլիսի 20–29–ը։ Հայկական կողմին հրավեր է ուղարկել օլիմպիադայի կազմկոմիտեի նախագահ Նարգիզ Փաշաևան։ Ուշադրություն դարձնելով նմանատիպ միջոցառումներին հայ դպրոցականների մասնակցության կարևորությանը` որոշում է ընդունվել, որ հայկական օլիմպիական թիմը կմասնակցի Բաքվի օլիմպիադային։ Այս պահին իրականացվում են թիմին նախապատրաստելու աշխատանքները։ –0–