ԵՐԵՎԱՆ, 3 ապրիլի. /Նովոստի-Արմենիա/. ՀՀ ԳԱԱ անդամները 2014 թ.–ին հրապարակել են 782 հոդված հեղինակավոր միջազգային գիտական հրատարակություններում, հայտարարեց ՀՀ ԳԱԱ նախագահ Ռադիկ Մարտիրոսյանը ուրբաթ ամենամյա ընդհանուր ժողովի ժամանակ, որը նվիրված է Ակադեմիայի 2014 թ.–ի գիտական և գիտա–կազմակերպչական գործունեության հիմնական արդյունքներին։
Նրա խոսքերով` 2014 թ.–ին ԳԱԱ անդամները տարբեր թեմաներով հրապարակել են 18 մենագրություն։
Ակադեմիան 2014 թ.–ի ընթացքում թեմատիկ, նպատակային գիտական ուսումնասիրությունների և այլ ծրագրերի ֆինանսավորման համար պետբյուջեից ստացել է մոտ 6.24 մլն դրամ, իսկ աշխատավարձերի ընդհանուր ֆոնդը կազմել է 5,4 մլրդ դրամ։
Ինչպես նշեց Մարտիրոսյանը, ԳԱԱ աշխատակիցների միջին աշխատավարձը 2014 թ.–ին կազմել է մոտ 104 հազար դրամ` առանց արտաբյուջետային միջոցների։
ԳԱԱ նախագահը տեղեկացրեց, որ հիմա ԳԱԱ համակարգում ներառված է 62 ակադեմիկոս և 60 թղթակից անդամ։ ԳԱԱ աշխատակիցների ընդհանուր թիվը կազմում է 4027, որոնցից 2450–ը գիտ. աշխատողներ են, 327–ը` գիտությունների դոկտոր, 1085–ը` գիտության թեկնածու, 1038–ը` գիտական աստիճան չունեցող աշխատակիցներ։
Մարտիրոսյանը նաև նշեց, որ 2014 թ.–ի ընթացքում ակտիվացել է Ռուսաստանի, Բելառուսի, ԵՄ երկրների գիտատեխնիկական կենտրոնների հետ ԳԱԱ–ի համագործակցությունը։
Ամենամյա ընդհանուր ժողովին մասնակցել է ՀՀ նախագահ Սերժ Սարգսյանը։
ԳԱԱ ակադեմիկոս–քարտուղար, թղթակից անդամ Հրանտ Մաթևոսյանը զեկուցեց ՀՀ ԳԱԱ 2014 թ.–ի գիտա–կազմակերպչական գործունեության մասին։
Ամենամյա ժողովի ժամանակ ներկայացվեց նաև ԳԱԱ ակադեմիկոսներ Գագիկ Ղազինյանի, Աշոտ Մելքոնյանի և Ռուբեն Սաֆրաստյանի կողմից պատրաստված «Հայոց ցեղասպանության ճանաչման և փոխհատուցման քաղաքա–իրավական խնդիրները» թեմայով զեկույցը։
Ժողովից առաջ մասնակիցները մեկ րոպե լռությամբ հարգեցին 2014 թ.–ին կյանք հեռացած ԳԱԱ անդամներ Գրիգոր Գուրզադյանի, Սևան Արևշատյանի, Ալբերտ Պողոսյանի և Աննա Բոյաջյանի հիշատակը։–0–
