Միխայիլ Պողոսյանը կշարունակի զբաղեցնել Միասնական ավիաշինարարական կորպորացիայի գլխավոր կոնստրուկտորի պաշտոնը

ԵՐԵՎԱՆ, 13 հունվարի. /Նովոստի–Արմենիա/. ՌԴ կառավարությունը հաստատել է ՌԴ արդյունաբերության և առևտրի նախարարության փոխնախարար Յուրի Սլյուսարին Միասնական ավիաշինարարական կորպորացիայի (ՄԱԿ) նախագահի պաշտոնում նշանակելու մասին դիրեկտիվը, ընկերության ներկա ղեկավար Միխայիլ Պողոսյանը կշարունակի զբաղեցնել գլխավոր կոնստրուկտորի պաշտոնը, տեղեկացրել է ՌԴ արդյունաբերության և առևտրի նախարար Դենիս Մանտուրովը։

1998 թ.–ի մարտից Պողոսյանը զբաղեցնում էր «Սուխոյ» ավիացիոն ռազմա–արդյունաբերական համալիրի գլխավոր տնօրենի պաշտոնը։ 2003 թ.–ի սեպտեմբերին ՌԴ կառավարության որոշմամբ նա նշանակվել էր ««Սուխոյ» ավիացիոն հոլդինգային ընկերություն» ԲԲԸ–ի գլխավոր տնօրենի պաշտոնում, որը միավորում էր «Սու» տեսակի ինքնաթիռների մշակողին և արտադրողներին։ 

Պողոսյանի ղեկավարությամբ «Սուխոյ» հոլդինգը սկսել է աշխատանք իրականացնել քաղաքացիական ինքնաթիռի ստեղծման ուղղությամբ։ 2003 թ.–ի մարտին «Սուխոյը» հաղթել է տարածաշրջանային ավիաուղիների համար ուղևորատար ինքնաթիռի ստեղծման մրցույթը։ Ինքնաթիռը կոչվել է «Russian Regional Jet», իսկ ավելի ուշ վերանվանվել է «Sukhoi Superjet 100»։

2007–2011 թթ.–ին Պողոսյանը զբաղեցրել է Միասնական ավիաշինարարական կորպորացիայի առաջին փոխնախագահի պաշտոնը։

2011 թ.–ի փետրվարին  նա դարձել է կորպորացիայի նախագահը։

2011 թ.–ի հունիսի 30–ին ««Սուխոյ» ընկերություն» ԲԲԸ–ի տնօրենների խորհուրդն ընտրեց Պողոսյանին տնօրենների խորհրդի նախագահի պաշտոնում։ 2012 թ.–ի հոկտեմբերին Պողոսյանը ներառվել է «Օբորոնպրոմ» ՄԿ–ի տնօրենների խորհրդի կազմում։ 2013 թ.–ի հունվարի 29–ին «Սուխոյի քաղաքացիական ինքնաթիռներ» ՓԲԸ–ի տնօրենների խորհրդի անդամները Պողոսյանին ընտրեցին ընկերության տնօրենների խորհրդի նախագահի պաշտոնում։

2015 թ.–ի հունվարի 13–ին ՌԴ կառավարությունը հաստատեց կորպորացիայի նախագահի պաշտոնում Պողոսյանի լիազորությունների վաղաժամ դադարեցման մասին դիրեկտիվը։ Նա շարունակել է զբաղեցնել գլխավոր կոնստրուկտորի պաշտոնը։ Պողոսյանը «ՍոյուզՄաշՌոսիի» ՍՊԸ–ի փոխնախագահի պաշտոնը։

Պողոսյանը Ռուսաստանի գիտությունների ակադեմիայի թղթակից–անդամ է, տեխնիկական գիտությունների դոկտոր, Մոսկվայի ավիացիոն ինստիտուտի ամբիոնի վարիչ։ Պողոսյանը 11 պատենտների և գյուտերի, 14 գիտական աշխատությունների հեղինակ է։ Նա ՌԴ պետական մրցանակի (1997), ՌԴ կառավարության մրցանակի (1998) դափնեկիր է։

2002 թ.–ին Միխայիլ Պողոսյանը պարգևատրվել է Փառքի շքանշանով Սու–33 կործանիչի ստեղծման գործում կատարած անձնական ներդրման համար։ Կործանիչն օգտագործվում է Ռուսաստանի ռազմածովային նավատորմի սպառազինության կազմում։ Պողոսյանն ամուսնացած է, ունի երկու զավակ։–0–