Առողջապահության ոլորտում Հայաստանի և Ռուսաստանի համագործակցությունը նոր մակարդակի վրա է բարձրանում. Սկվորցովա
ԵՐԵՎԱՆ, 7 նոյեմբերի./Նովոստի-Արմենիա/. Առողջապահության ոլորտում Հայաստանի և Ռուսաստանի համագործակցությունը բարձրանում է ամբողջովին նոր մակարդակի վրա համակարգերի մոտ լինելու և համատեղ գործողությունների ակտիվության աստիճանով, ուրբաթ ասաց ՌԴ առողջապահության նախարար Վերոնիկա Սկվորցովան Հայ-ռուսական առողջապահական առաջին համաժողովի ժամանակ:
Հայ-ռուսական առողջապահական առաջին համաժողովը բացվել է Երևանում նոյեմբերի 7-ին: Համաժողովի աշխատանքներին մասնակցում է ՌԴ առողջապահության նախարար Վերոնիկա Սկվորցովայի գլխավորած պատվիրակությունը, որի կազմում են հայտնի պրոֆեսորներ, ինչպես նաև գործող բժիշկներ բժշկության տարբեր ոլորտներից:
«Մենք ընտրել ենք երեք հիմնական ուղղություններ, որոնց շրջանակում ստորագրվել են փոխըմբռնման հուշագրեր: Դա մեր համագործակցությունն է դեղամիջոցների և բժշկական սարքերի շրջանառության ոլորտում, կադրերի պրոֆեսիոնալ պատրաստման, կրթության և պրոֆեսիոնալ զարգացման ոլորտներում, ինչպես նաև կազմակերպչական և զուտ բժշկական տեխնոլոգիաների ոլորտներում: Չորրորդ ուղղությունը, իհարկե, մեր պրոֆեսիոնալ հանրությունների շփումն է», - ասել է Սկվորցովան:
Համաժողովի ընթացքում երկու երկրի առողջապահության նախարարությունների միջև ստորագրվել է դեղերի շրջանառության, բժշկական սարքավորումների և կենսաակտիվ հավելումների, շարունակական բժշկական զարգացման, ինչպես նաև առողջապահական համակարգերի միջև տեղեկատվության ապահովման, էլեկտրոնային առողջապահության և հեռաբժշկության ոլորտներում փոխըմբռնման երեք հուշագիր: ՌԴ և ՀՀ ազգային բժշկական պալատները և Հայաստանի առողջապահության կազմակերպիչների ասոցիացիան ստորագրել են համագործակցության մասին պայմանագիր:
Սկվորցովայի խոսքերով՝ հայկական բժշկությունը միշտ, դեռ խորհրդային ժամանակներից, առաջատար բժշկական դպրոցներից է եղել. «Երևանում գործում է հիանալի բժշկական համալսարան, և փայլուն գիտնականների մի աստղաբույլ է տվել Հայաստանը»:
«Հայաստանն ունի հիանալի մանկաբուժական, վիրաբուժական դպրոց, այդ պատճառով մենք իրարից շատ բան կարող ենք սովորել», - նշել է նախարարը:
Ռուսաստանի ազգային բժշկական պալատի նախագահ, պրոֆեսոր Լեոնիդ Ռոշալի խոսքերով՝ Ռուսաստանը պետք է Հայաստանից սովորի գոյատևել բարդագույն պայմաններում, առաջին հերթին առողջապահության ֆինանսավորման պակասի պայմաններում, որտեղ համատեղ աշխատանքի համար մեծ դաշտ կա:
«Ես կցանկանայի մաղթել Հայաստանին կենտրոնանալ կարևորագույն հարցերի լուծման վրա, որոնք, իմ կարծիքով, շատ լավ հասկանում է առողջապահության նոր նախարարը, նրան պետք է օգնել», - ասել է Ռոշալը:-0-
