Արդեն երկու շաբաթից .yandex դոմենային գոտին կարող է աշխատել. թերթ

ԵՐԵՎԱՆ, 15 հուլիսի. /Նովոստի–Արմենիա/. «Յանդեքս» ռուսական ինտերնետ–ընկերությունը ծրագրում է երկու շաբաթից գործարկել .yandex սեփական դոմենային գոտին, որն ավելի վաղ ինտերնետի կարգավորմամբ զբաղվող ICANN կորպորացիայի հավանությանն է արժանացել, գրում է «Իզվեստիա» թերթը` հղում անելով «Յանդեքսի» մամուլի ծառայությանը։

«ICANN–նն իսկապես հավանություն է տվել .yandex դոմենային գոտու ստեղծմանը, մենք պատրաստվում ենք գործարկել այն»,– ասել են «Յանդեքսի» մամուլի ծառայությունից։

Թերթի տվյալներով` «.yandex գոտին կարող է աշխատել արդեն երկու շաբաթից»։ Ենթադրվում է, որ առաջին աշխատող դոմեններ կդառնան nic.yandex և whois.yandex կայքերը։

«Մենք չենք ծրագրում վճարովի գրանցում բացել .yandex–ում։ Այժմ Ռուսաստանից օգտագործողներն ամենից հաճախ մտնում են yandex.ru, իսկ, օրինակ, Թուրքիայից` yandex.com.tr.։ *.yandex–ում կլինի նույն տեղեկությունը` որոնում, մեր ծառայությունները և «Յանդեքս» ընկերության մասին տեղեկություն (օրինակ` poisk.yandex կամ market.yandex)։

Եթե ընկերությունների, քաղաքների և կազմակերպությունների մեծամասնության մոտ հայտնվեն առաջին մակարդակի դոմեններ, օգտագործողները կսովորեն, և նրանց ավելի հարմար կլինի նոր ձևաչափով հասցեներ մուտքագրել»,– հստակեցրել են մամուլի ծառայությունում, հաղորդում է ՌԻԱ Նովոստին։

2012 թվականի սկզբում ICANN կորպորացիան վերին մակարդակի դոմենային նոր գոտիների հայտերի հավաքագրում է անցկացրել։ Ցանկացած իրավաբանական անձ կարող էր .brand տեսակի դոմենի հայտ ներկայացնել։ Դեկտեմբերի սկզբին անցկացվել է ավելի քան 1.9 հազար հայտերի վիճակահանություն 1.4 հազար նոր դոմենների գրանցման համար։ ICANN–ին ներկայացվել են կիրիլիկ դոմենային գոտիների ևս հինգ հայտեր` .москва, .дети, .католик, .ком, .орг.։ Նույն ժամանակ հայտեր են ներկայացրել «Յանդեքս»–ը (դոմեն`.yandex) և «ՆԻՍ–ԳԼՈՆԱՍՍ» ընկերությունը (դոմեն` .gdn)։ «Յանդեքսի» դոմենային գոտին արժանացել է ICANN–ի հավանությանը նախորդ տարի։ -0-