Ռոսկոսմոսը կուսումնասիրի Հայաստանի ներուժը տիեզերական ոլորտում

ԵՐԵՎԱՆ, 10 մարտի. /Նովոստի–Արմենիա/. «Ռոսկոսմոս» դաշնային տիեզերական գործակալությունում ձևավորվել է աշխատանքային խումբ, որի նպատակն է Հայաստանում ուսումնասիրություններ իրականացնել տիեզերքը խաղաղ նպատակներով օգտագործելու և հանրապետությունում այդ ոլորտում առկա ներուժն օգտագործելու հնարավորությունների ուղղությամբ, հայտնում է Հայաստանի ազգային անվտանգության մամուլի ծառայությունը` ներկայացնելով Ռոսկոսմոսի ղեկավար Սերգեյ Սերեդինի և ԱԱԽ քարտուղար Արթուր Բաղդասարյանի հանդիպման արդյունքները։

Հաղորդագրությունում նշվում է, որ աշխատանքային խումբը ստեղծվել է Բաղդասարյանի և Ռոսկոսմոսի ղեկավար Օլեգ Օստապենկոյի հետ ձեռք բերված պայմանավորվածության շրջանակում։

Հանդիպմանը Արթուր Բաղդասարյանը նախ նշել է, որ աշխատանքային խմբի ստեղծումը և այս հանդիպումը համահունչ են գիտատեխնիկական և արդյունաբերության ոլորտներում հայ-ռուսական փոխգործակցությանը: 

Արթուր Բաղդասարյանը հիշեցրել է, որ «Ռոսկոսմոսի» հետ արդեն կա համագործակցության փորձ` մատնանշելով Ռուսաստանի Դաշնության և ՀՀ Ազգային անվտանգության խորհուրդների 2012-2013թթ. համագործակցության ծրագրի շրջանակներում իրականացվող Բյուրականի աստղադիտարանի համալիր արդիականացման աշխատանքները:

ԱԱԽ քարտուղարն ընդգծել է, որ Հայաստանն ունի գիտական մեծ ներուժ, որը կարող է արդյունավետորեն օգտագործվել տիեզերական ուսումնասիրությունների, հայտնագործությունների և ճյուղային արտադրության զարգացման ոլորտում:

Նա աշխատանքային խմբին տեղեկացրել է, որ Հայաստանում առկա են ձեռնարկություններ, որոնք կարող են ռուսաստանյան ձեռնարկություններին մատակարարել տիեզերագնացության մեջ օգտագործվող ռադիոէլեկտրական սարքավորումներ:

«Ռոսկոսմոսի» ներկայացուցիչներն իրենց հերթին արդյունավետ են գնահատել համագործակցության հնարավորությունները և պատրաստակամություն հայտնել առաջիկայում հայկական ձեռնարկությունների հետ ընդլայնել փոխգործակցության ուղղությունները:

Աշխատանքային խմբի անդամները հանդիպումներ են նախատեսում Բյուրականի աստղադիտարանում, Աշտարակի ռադիոֆիզիկական գիտահետազոտական ինստիտուտում, ՀՀ ԳԱԱ գիտահետազոտական ինստիտուտների ղեկավարների հետ:

ԱԱԽ քարտուղարի հրավերով առաջիկայում նախատեսվում է նաև «Ռոսկոսմոսի» ղեկավար Օլեգ Օստապենկոյի գլխավորած պատվիրակության այցը Հայաստան: -0-