Գլոբալ տաքացումն իսկապես ավելացնում է Աֆրիկայում տեղի ունեցող պատերազմների թիվը. գիտնականներ

ԵՐԵՎԱՆ, 14 հունվարի. /Նովոստի–Արմենիա/. Գիտնականները սխալներ են գտել հոդվածում, որի հեղինակներն ապացուցում էին, թե գլոբալ տաքացումը կապ չունի Աֆրիկայում զինված հակամարտությունների թվի աճի հետ, հաղորդում է ՌԻԱ Նովոստին։

Աֆրիկայում ջերմաստիճանը գլոբալ ջերմացման պատճառով վերջին կես դարում հատկապես նկատելի է բարձրանում։ Միաժամանակ, «սև մայրցամաքում» նկատվում է քաղաքացիական պատերազմների թվի աճ, որը բարձրակետի է հասել 20–րդ դարի 90–ական թվականներին։ Արդեն մի քանի տարի է, ինչ գիտնականները վիճում են, թե կարելի է, արդյո՞ք, կապել պատերազմները կլիմայի փոփոխության հետ, և հիմնական բանավեճերից մեկն ընթանում է Proceedings of the National Academy of Sciences ամսագրում։

2009 թվականին Բերքլիում Կալիֆոռնիայի համալսարանից Մարշալ Բըրքը (Marshall Burke) և Սթենֆորդի համալսարանից Դևիդ Լոբելն (David Lobell) ամսագրում հոդված են հրապարակել, որում ապացուցել են կապը ջերմաստիճանի բարձրակետերի և զինված հակամարտությունների միջև Աֆրիկայում 1981-2002 թվականներին։ Նրանց հաշվարկներով, օդի ջերմաստիճանի բարձրացումը տարածաշրջանում կարող է հանգեցնել պատերազմների թվի աճին ավելի քան 50 տոկոսով, որոնցում մինչև 2030 թվականին կտուժի գրեթե 400 հազար մարդ։

Նրանց գործընկերները թերահավատորեն են մոտեցել այդ եզրահանգումներին, և 2010 թվականին ամսագրում հրապարակվել է Օսլոյի Աշխարհի հետազոտական ինստիտուտի քաղաքացիական պատերազմների ուսումնասիրության կենտրոնից Հալվարդ Բուհաուգի (Halvard Buhaug) և նրա գործընկերների աշխատանքը, ովքեր վերլուծել են 1960 թվականից տվյալները և կապ չեն գտել ջերմացման և Աֆրիկայի պատերազմների միջև։ Նրանք կարծում են, որ հակամարտությունների հիմնական պատճառները քաղաքականության և տնտեսության ոլորտում են։

Նոր հոդվածում ամերիկացի գիտնականներ Սողոմոն Սյանը (Solomon Hsiang) Բերքլիում Կալիֆոռնիայի համալսարանից և Քայլ Մենը (Kyle Meng) Պրինստոնի համալսարանից համեմատել են երկու հետազոտություններում օգտագործված վիճակագրական մոդելները։ Նրանք եկել են եզրահանգման, որ Բուհաուգը որոշ սխալներ է թույլ տվել, և տվյալների ճշգրիտ մշակման դեպքում նրա  հետազոտության արդյունքները չեն հակասում առաջին հոդվածի եզրակացություններին։

Կոպիտ ասած` դա չի ապացուցում ջերմացման և Աֆրիկայում զինված հակամարտությունների թվի աճի միջև, նշում են Սյանը և Մենը, սակայն դա են հաստատում Սյանի և այլ գիտնականների հետազոտությունները։ -0-