Հարաբերականության տեսության ստեղծողի՝ մեծ ֆիզիկոս Ալբերտ Էյնշտեյնի ուղեղն առաջին անգամ ցուցադրվում է Ֆիլադելֆիայի Թոմաս Մյութերի անվան բժշկական թանգարանում, CBS հեռուստաընկերության եթերում հայտնել են ամերիկացի գիտնականները:
Թանգարանի այցելուները կարող են տեսնել, որ գիտնականի ուղեղի 46 կտրվածքներն ավելի բարակ են մարդու մազից, դրանցից մեկը մանրադիտակի տակ է դրված, հաղորդում է ՌԻԱ Նովոստին:
Ֆիլադելֆիայի մանկական հիվանդանոցի նյարդաբան, դոկտոր Լյուսի Ռորկ-Էդամսը CBS-ի «Talk Philly» ծրագրում հայտնել է, որ մեծացնելու դեպքում Էյնշտեյնի ուղեղը միանգամայն երիտասարդ մարդու ուղեղի տեսք ունի, և այն մաշվացության պիգմենտ չունի, ինչը բնորոշ է ծեր մարդկանց: Բացի այդ, գիտնականի գլխուղեղի անոթները նույնպես «հիանալի վիճակում են»,- ասել է նա:
«Զարմանալի է, որ այն ծերության ոչ մի նշաններ չունի»,-ընդգծել է Ռորկ-Էդամսը: Էյնշտեյնը մահացել է 1955թ.-ին 76 տարեկան հասակում՝ որովայնային աորտայի պատռվածքից:
Ախտաբան Թոմաս Հարվին դիահերձման ստանդարտ ընթացակարգի ժամանակ հանել է հանճարի ուղեղը և իր մոտ պահել, ինչը մահացած գիտնականի հարազատների բողոքների արդյունքում մեծ աղմուկ բարձրացրեց:
Հարվին կորցրեց աշխատանքը, բայց Էյնշտեյնի ուղեղը նրա մոտ մնաց: Ձգտելով հասկանալ, թե արդյո՞ք հանճարի ուղեղը տարբերվում է սովորական մարդկանց ուղեղից, ախտաբանն ԱՄՆ տարբեր գիտնականներին այդ ուղեղի մասնիկներ էր ուղարկում: Այսպիսով, դրանց մի մասը երրորդ ձեռքի միջոցով հայտնվեց դոկտոր Ռորկ-Էդամսի մոտ, և նա էլ որոշեց գիտնականի ուղեղի կտրվածքները հանձնել Մյութերի անվան թանգարանին:
Չնայած որ դրանք այժմ պահվելու են թանգարանում՝ գիտնականները կարող են շարունակել հետազոտությունը, հաղորդում է CBS-ը: Ըստ հեռուստաընկերության տվյալների, հետագայում ցուցադրումը կհամալրվի Ալբերտ Էյնշտեյնի գլխուղեղի բջիջների՝ մարադիտակով մեծացված պատկերների լուսանկարներով: -0-
